ഗോതന്‍ബര്‍ഗ്: പി.എസ്.ജിയില്‍ നിന്ന് മാഞ്ചസ്റ്റര്‍ യുനൈറ്റഡിലേക്ക് കൂടു മാറിയ സ്വീഡന്‍ താരം ഇബ്രാഹിമോവിച്ചിന് ആദ്യഗോള്‍. അരങ്ങേറ്റം കുറിച്ച് നാലാം മിനുട്ടിലാണ് ഇബ്രാ മാഞ്ചസ്റ്റര്‍ യുനൈറ്റഡിനായി ഗോള്‍ നേടിയത്. പ്രീ സീസണ്‍ ഫുട്ബാള്‍ സൗഹൃദ മത്സരത്തില്‍ ഗലാത്‌സരെക്കെതിരേയായിരുന്നു ഗോള്‍.
 
മത്സരത്തില്‍ യുനൈറ്റഡ് 5 -2ന് തകര്‍പ്പന്‍ ജയം നേടി. വലതുവിങ്ങില്‍നിന്ന് അന്റോണിയോ വലന്‍സിയ നല്‍കിയ ക്രോസ്, തന്റെ ക്ലാസ് ബൈസിക്കിള്‍ കിക്കിലൂടെ വലയിലാക്കി ഇബ്ര കോച്ച് മൗറീഞ്ഞോയുടെ മനം നിറച്ചത്. നാലാം മിനുട്ടില്‍ ഇബ്രയിലൂടെ തുടങ്ങിയ ജോസ് മൗറീഞ്ഞോയുടെ ടീമിനെ ഇരട്ട ഗോളിലൂടെ വെയ്ന്‍ റൂണി (55, 59) മുന്നിലത്തെിച്ചു. മൗറെയ്ന്‍ ഫെല്ലെയ്‌നി (62), യുവാന്‍ മാറ്റ (75) എന്നിവരുടെ വകയായിരുന്നു മറ്റു രണ്ട് ഗോളുകള്‍.