കോഴിക്കോട്: ജില്ലയെ മാലിന്യമുക്തമാക്കാന്‍ വിവിധ സര്‍ക്കാര്‍, സര്‍ക്കാരിതര ഘടകങ്ങളുടെ സഹായത്തോടെ ജില്ലാ ഭരണകൂടം നടപ്പാക്കുന്ന 'സീറോ വേസ്റ്റ് കോഴിക്കോട് ' പദ്ധതി സേവിന്റെ നേതൃത്വത്തില്‍ ജില്ലയിലെ സ്‌കൂളുകളില്‍ വ്യാപിപ്പിക്കുന്നു. ജില്ലാതല ഉദ്ഘാടനം മാനാഞ്ചിറ മോഡല്‍ ഹൈസ്‌കൂളില്‍ നടന്നു. കോഴിക്കോട് വിദ്യാഭ്യാസ ജില്ലയിലെ 150ഓളം വിദ്യാലയങ്ങളിലെ പരിസ്ഥിതി ക്ലബ് കോഡിനേറ്റര്‍മാരായ അധ്യാപകര്‍ക്കുള്ള ശില്‍പശാലയും നടത്തി.
സ്‌കൂളുകളിലെ ഓരോ ക്ലാസില്‍നിന്നും പരിസ്ഥിതി വിഷയത്തില്‍ താല്‍പര്യമുള്ള ഓരോ വിദ്യാര്‍ഥിയെ തിരഞ്ഞെടുത്ത് ശുചിത്വസാക്ഷരതാ പരിശീലനം നല്‍കും. പരിശീലനത്തിനൊടുവില്‍ നടക്കുന്ന മൂല്യനിര്‍ണയത്തില്‍ മികച്ച ഗ്രേഡ് ലഭിക്കുന്ന വിദ്യാര്‍ഥികളെ ഹരിത അംബാസിഡര്‍മാരായി പ്രഖ്യാപിക്കും.
പാഴ്‌വസ്തുക്കള്‍ വലിച്ചെറിയുന്നത് നിരുത്സാഹപ്പെടുത്തുക, ജൈവവസ്തുക്കള്‍ സ്‌കൂള്‍ കോംപൗണ്ടില്‍ സംസ്‌കരിക്കുന്നതിനു സ്‌കൂള്‍ ഒരുക്കുന്ന സംവിധാനത്തിലേക്കു മാറ്റുക, അജൈവ വസ്തുക്കള്‍ തരംതിരിച്ച് വൃത്തിയാക്കി ക്ലാസില്‍ സൂക്ഷിച്ച് സ്‌കൂളില്‍ ഒരുക്കുന്ന മെറ്റീരിയല്‍ റിക്കവറി ഫെസിലിറ്റി സെന്ററിലേക്ക് മാറ്റുക എന്നീ പ്രവര്‍ത്തനങ്ങള്‍ക്ക് ക്ലാസിലെ മുഴുവന്‍ വിദ്യാര്‍ഥികളെയും സജ്ജരാക്കുകയാണ് ഇവരുടെ ചുമതല.
ജില്ലാതല ഉദ്ഘാടനം കലക്ടര്‍ യു.വി ജോസ് നിര്‍വഹിച്ചു. മാലിന്യ നിര്‍മാര്‍ജന വിഷയത്തില്‍ വിട്ടുവീഴ്ചയില്ലെന്നും കേവലം ബോധവല്‍ക്കരണം മാത്രമല്ല, മാലിന്യ നിര്‍മാര്‍ജനത്തിനുള്ള സിസ്റ്റം 70 പഞ്ചായത്തുകളിലും സജ്ജമാക്കിയിട്ടുണ്ടെന്നും അദ്ദേഹം പറഞ്ഞു. വിദ്യാഭ്യാസ ഉപഡയരക്ടര്‍ ഇ.കെ സുരേഷ് കുമാര്‍ അധ്യക്ഷനായി. പ്രൊഫ. ശോഭീന്ദ്രന്‍ ഹരിതസന്ദേശം നല്‍കി.
സേവ് ജില്ലാ കോഡിനേറ്റര്‍ വടയക്കണ്ടി നാരായണന്‍ പദ്ധതി വിശദീകരിച്ചു. ശുചിത്വമിഷന്‍ അസി. കോഡിനേറ്റര്‍ കെ. കുഞ്ഞിരാമന്‍, കെ.കെ ഗൗരി, അബ്ദുല്ല സല്‍മാന്‍, ഏകനാഥന്‍, ഷൗക്കത്തലി എരോത്ത്, ഇ.എം രാജന്‍, വി. ഷീജ, പ്രമോദ് മന്നാടത്ത് സംസാരിച്ചു. ബി.ആര്‍.സി ട്രെയിനര്‍ എന്‍.കെ റോബിന്‍ ശില്‍പശാലയ്ക്ക് നേതൃത്വം നല്‍കി.
വടകര വിദ്യാഭ്യാസ ജില്ലയില്‍ 23നു ഡയറ്റിലും താമരശ്ശേരിയില്‍ 25നു താമരശ്ശേരി ജി.വി.എച്ച്.എസ്.എസിലും അധ്യാപക ശില്‍പശാല നടക്കും. പരിശീലനം നേടിയ അധ്യാപകര്‍ രണ്ടു പ്രവൃത്തി ദിവസത്തിനകം ക്ലാസുതല ഗ്രീന്‍ അംബാസിഡര്‍മാര്‍ ക്കുള്ള പരിശീലനം പൂര്‍ത്തിയാക്കണം. നവംബര്‍ രണ്ടിനകം ഓരോ സ്‌കൂളിലും ഗ്രീന്‍ അംബാസിഡര്‍മാരുടെ പ്രഖ്യാപനം നടത്തണം. ജില്ലാതല പ്രഖ്യാപനം നവംബര്‍ മൂന്നിനു നടക്കും.