മുള്ളേരിയ (കാസര്‍കോട്): മഞ്ചേശ്വരത്ത് തെരഞ്ഞെടുപ്പ് അങ്കം മുറുകുമ്പോള്‍ മുള്ളേരിയയില്‍ കോഴി അങ്കം. വിജനമായ കുന്നില്‍ ചെരിവില്‍ കോഴിയങ്കത്തില്‍ ഏര്‍പ്പെട്ട അഞ്ച് പേരെ അറസ്റ്റ് ചെയ്തു. ഇവരില്‍ നിന്നും എട്ട് അങ്ക കോഴികളേയും 3150 രൂപയും ആദൂര്‍ സബ്ബ് ഇന്‍സ്‌പെക്ടര്‍ വിഷ്ണു പ്രസാദിന്റെ നേതൃത്വത്തിലുള്ള പൊലിസ് സംഘം പിടികൂടി.

മുള്ളേരിയ നൂജിയിലെ മുദ്ദ (48), കയാര്‍പദവിലെ രമേശ്(42), ഗോസാഡയിലെ റോഷന്‍ ഡി സൂസ(32), ആലന്തടുക്കയിലെ രാജേഷ്(32), നാട്ടേക്കല്ലിലെ സതീശന്‍(33) എന്നിവരാണ് അറസ്റ്റിലായത്. ബെള്ളൂര്‍ പഞ്ചായത്തിലെ ബസ്തിയില്‍ കോഴിയങ്കം നടക്കുന്നുണ്ടെന്ന രഹസ്യ വിവരത്തെ തുടര്‍ന്നാണ് പൊലിസ് സംഘം പരിശോധനക്കിറങ്ങിയത്. അവധി ദിവസങ്ങളില്‍ അതിര്‍ത്തി ഗ്രാമങ്ങളില്‍ കോഴിയങ്കം വ്യാപകമാണെന്ന് പരാതിയുണ്ട്. കോഴിയുടെ കാലുകളില്‍ ബ്ലൈഡ് വച്ചു കെട്ടി പരിശീലനം നടത്തിയ അങ്ക കോഴികളെയാണ് ഇതില്‍ പങ്കെടുപ്പിക്കുന്നത്.