എടപ്പാള്‍: സംസ്ഥാനപാതയില്‍ തിരക്കേറിയ തങ്ങള്‍ പടി ജങ്ഷന്‍ അപകട കേന്ദ്രമാകുന്നു. ദിവസങ്ങള്‍ക്കുള്ളില്‍ നിരവധി അപകടങ്ങളാണ് ഇവിടെ നടന്നത്. കൊണ്ടോട്ടി സ്വദേശികളായ പിതാവും മകനും സഞ്ചരിച്ച ബൈക്ക് കാറുമായി കൂട്ടിയിടിച്ച് പരുക്കേറ്റതാണ് ഒടുവിലുണ്ടായത്. എം.ഇ.എസ് എന്‍ജിനീയറിങ് കോളജ്, എം.ഇ.എസ് സ്‌കൂള്‍, കെല്‍ട്രോണ്‍, തൃക്കണാപുരം എ.എല്‍.പി സ്‌കൂള്‍ എന്നിവിടങ്ങളില്‍ പഠിക്കുന്ന വിദ്യാര്‍ഥികള്‍ ആശ്രയിക്കുന്ന ബസ് സ്റ്റോപ്പും ഇവിടെയുണ്ട്.
കുറ്റിപ്പുറത്ത് നിന്നും കുമ്പിടി, ആനക്കര, തൃത്താല ഭാഗങ്ങളിലേക്കുളള വാഹനങ്ങള്‍ക്ക് കടന്ന് പോകുന്ന പ്രധാന ജങ്ഷന്‍ കൂടിയാണ് തങ്ങള്‍ പടി.
ജങ്ഷനും വളവും ഒന്നിച്ച് വരുന്ന ഇവിടെ സ്പീഡ് ബ്രേക്കര്‍ സംവിധാനമോ, ഡിവൈഡറുകളൊ, വ്യക്തമായ സീബ്രാലൈനുകളോ ഇല്ല.
മതിയായ സുരക്ഷാ സംവിധാനങ്ങളൊരുക്കാത്തതാണ് തങ്ങള്‍ പിടയില്‍ അപകടങ്ങള്‍ കൂടുന്നതെന്നും അതിനാല്‍ ഉടന്‍ തന്നെ ആവശ്യമായ സുരക്ഷാ സംവിധാനമൊരുക്കാന്‍ സംസ്ഥാന പാത അധികൃതരും പോലിസും തയാറാകണമെന്നാവശ്യപ്പെട്ട് യൂത്ത് കോണ്‍ഗ്രസ്സ് നിയോജകമണ്ഡലം സെക്രട്ടറി ശറഫുദ്ദീന്‍ തൃക്കണാപുരത്തിന്റെ നേതൃത്വത്തില്‍ പരാതി നല്‍കി.