ന്യൂഡല്‍ഹി: ഇന്ത്യയിലെ പത്രാധിപരുടെ സംഘടനയായ എഡിറ്റേഴ്‌സ് ഗില്‍ഡിന്റെ പുതിയ ഭാരവാഹി പട്ടികയിലും ലൈംഗികാതിക്രമം നടത്തിയെന്ന് ആരോപണം നേരിടുന്ന എം.ജെ അക്ബറിന്റെയും തരുണ്‍ തേജ്പാലിന്റെയും പേരുകള്‍. ലൈംഗികാതിക്രമ ആരോപണ വിധേയനായ മറ്റൊരു മുതിര്‍ന്ന മാധ്യമപ്രവര്‍ത്തകനും ഡി.എന്‍.എ സ്ഥാപക പത്രാധിപരുമായ ഗൗതം അധികാരിയുടെ പേരും പട്ടികയിലുണ്ട്.
ലൈംഗിക ആരോപണം നേരിടുന്ന മാധ്യമപ്രവര്‍ത്തകരെ സംഘടനയില്‍നിന്ന് പുറത്താക്കണമെന്ന് അംഗങ്ങള്‍ ആവശ്യപ്പെട്ടിരുന്നു. ഈ ആവശ്യം അവഗണിച്ചാണ് ആരോപണവിധേയരെ ഉള്‍പ്പെടുത്തി ഭാരവാഹി പട്ടിക പുതുക്കിയിരിക്കുന്നത്. ഗില്‍ഡിന്റെ നിര്‍വാഹകസമിതി അംഗങ്ങളാണ് നിലവില്‍ ഈ മൂന്നുപേരും. 28 അംഗ നിര്‍വാഹകസമിതി അംഗങ്ങളില്‍ നാല് സ്ത്രീകള്‍ മാത്രമാണുള്ളത്.
വനിതാ മാധ്യമപ്രവര്‍ത്തകരോട് ലൈംഗികാതിക്രമം കാണിച്ചുവെന്ന ആരോപണം നേരിട്ടതിനെ തുടര്‍ന്ന് കഴിഞ്ഞ മാസമാണ് എം.ജെ അക്ബര്‍ വിദേശകാര്യ സഹമന്ത്രി പദവി രാജിവച്ചത്. 2013ലാണ് തെഹല്‍ക്ക സ്ഥാപക പത്രാധിപരും അന്വേഷണാത്മക മാധ്യമപ്രവര്‍ത്തകനുമായ തരുണ്‍ തേജ്പാല്‍ ലൈംഗിക പീഡനക്കേസില്‍ ഉള്‍പ്പെട്ടത്.