തിരുവനന്തപുരം: ഗുവാഹത്തിയില്‍ നടന്ന 64ാമത് ദേശീയ സ്‌കൂള്‍ ഗെയിംസില്‍ പങ്കെടുത്ത കേരള ടീമിലെ കായിക താരങ്ങള്‍ക്ക് കായിക മന്ത്രി ഇ.പി ജയരാജന്റെ ഇടപെടലിലൂടെ തിരികെ നാട്ടിലേക്ക് സുഖയാത്ര.
വെയിറ്റ് ലിഫ്റ്റിങ്, ബോക്‌സിങ് മത്സരങ്ങളില്‍ മികച്ച നേട്ടം കരസ്ഥമാക്കി ദിബ്രുഗഢ് - കന്യാകുമാരി വിവേക് എക്‌സ്പ്രസില്‍ തിരിച്ചുവന്ന കേരള ടീമിലെ 55 കായിക താരങ്ങള്‍ക്കാണ് യാത്രാ സൗകര്യം ലഭ്യമായത്. തിരികെയുള്ള യാത്രാപ്പട്ടികയില്‍ വെയിറ്റിങ് ലിസ്റ്റിലായിരുന്നു താരങ്ങളുടെ സ്ഥാനം. ഈ വിഷയം ശ്രദ്ധയില്‍പെട്ട മന്ത്രി കായിക താരങ്ങള്‍ക്ക് യാത്ര സുഖകരമാക്കുന്നതിന് അധിക കോച്ച് അനുവദിക്കണമെന്ന് ആവശ്യപ്പെട്ട് കേന്ദ്ര റെയില്‍വേ മന്ത്രി പീയുഷ് ഗോയലിന് കത്ത് അയച്ചിരുന്നു. ഇതിന്റെ ഭാഗമായാണ് റെയില്‍വേ അധിക കോച്ച് അനുവദിച്ചത്. അധിക കോച്ച് അനുവദിച്ച ഇന്ത്യന്‍ റെയില്‍വേക്ക് ഇ.പി ജയരാജന്‍ നന്ദി അറിയിച്ചു.