കുന്ദമംഗലം: സംസ്ഥാന സൂപ്പര്‍ സോണ്‍ വോളിബോള്‍ ചാംപ്യന്‍ഷിപ്പില്‍ ആദ്യ ജയം തിരുവനന്തപുരത്തിന്. വനിതാവിഭാഗം മത്സരത്തില്‍ വയനാടിനെ ഏകപക്ഷീയമായ മൂന്നു സെറ്റുകള്‍ക്കാണ് ജേതാക്കളായ തിരുവനന്തപുരം കീഴടക്കിയത്. സ്‌കോര്‍: 25-14, 25-15, 25-16. തിരുവനന്തപുരത്തിന് വേണ്ടി സീനിയര്‍ ഇന്ത്യന്‍ താരങ്ങളായ എസ്. രേഖ, അഞ്ജു, കെ.എസ് ജിനി, എം. ശ്രുതി, അശ്വതി രവീന്ദ്രന്‍, ജൂനിയര്‍ ഇന്ത്യന്‍ താരങ്ങളായ ടി.എസ് കൃഷ്ണ, അഞ്ജലി എന്നിവര്‍ കളിക്കളത്തിലിറങ്ങി. ആദ്യ സെറ്റില്‍ 10 പോയിന്റ് വരെ വയനാട് പൊരുതി നോക്കി. എന്നാല്‍, കരുത്തരായ തിരുവനന്തപുരത്തിന് മുന്നില്‍ കൂടുതല്‍ സമയം പിടിച്ചു നില്‍ക്കാന്‍ വയനാടിനായില്ല.