കുന്നംകുളം : കുന്നംകുളം കേരള സംസ്ഥാന യുവജനക്ഷേമ ബോര്‍ഡിന്റെ ആഭിമുഖ്യത്തില്‍ നടത്തുന്ന കേരളോത്സവം 2017 ന്റെ സംസ്ഥാന തല ഉദ്ഘാടനം കായിക യുവജനകാര്യ വകുപ്പ് മന്തി എ.സി മൊയ്തീന്‍ ഭദ്രദീപം തെളിയിച്ച് നിര്‍വഹിച്ചു. നാലിന് കടവല്ലൂര്‍ പഞ്ചായത്ത് മൈതാനത്ത് നിന്നും മേഖലയിലെ സ്‌കൂളുകളില്‍ നിന്നും ക്ലബ്ബുകളില്‍ നിന്നുമായി നിരവധി വിദ്യാര്‍ഥികള്‍ പങ്കെടുത്ത കലാപരിപാടികളോടു കൂടിയ ഘോഷയാത്ര നടന്നു.
ചടങ്ങില്‍ എം.പി പി.കെ ബിജു അധ്യക്ഷനായി. ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍, യുവജനക്ഷേമ ബോര്‍ഡ് വൈസ് ചെയര്‍മാന്‍ പി.ബിജു, യുവജനക്ഷേമ ബോര്‍ഡ് മെമ്പര്‍ അഫ്‌സല്‍ കുഞ്ഞുമോന്‍, ജില്ലാ യൂത്ത് പ്രോഗ്രാം ഓഫിസര്‍ ബി.ഷീജ, ജില്ലാ യൂത്ത് കോ-ഓഡിനേറ്റര്‍ ഒ.എസ് സുബീഷ്, കടവല്ലൂര്‍ ഗ്രാമ പഞ്ചായത്ത് പ്രസിഡന്റ് യു.പി.ശോഭന, കടവല്ലൂര്‍ ഗ്രാമ പഞ്ചായത്ത് വൈസ് പ്രസിഡന്റ് കെ.ഇ സുധീര്‍, കടവല്ലൂര്‍ ഗ്രാമ പഞ്ചായത്ത് യൂത്ത് കോ-ഓഡിനേറ്റര്‍ വി.എം അഷ്‌റഫ് സാംസ്‌കാരിക സാമൂഹ്യ രംഗത്തെ പ്രമുഖര്‍ പങ്കെടുത്തു. ചടങ്ങില്‍ പ്രകൃതി സംരക്ഷണ രംഗത്തെ മികച്ച പ്രവര്‍ത്തനത്തിന് ജില്ലയിലെ തെരഞ്ഞെടുത്ത ക്ലബുകള്‍ക്ക് ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ ക്യാഷ് അവാര്‍ഡ് നല്‍കി അനുമോദിച്ചു.
3-ാം തിയ്യതി ഞായറാഴ്ച മുതല്‍ പഞ്ചായത്ത് തല മത്സരങ്ങള്‍ ആരംഭിക്കും. 59 ഇനം കലാപരിപാടികള്‍, 46 ഇനം കായികമത്സരങ്ങള്‍ എന്നിങ്ങനെയാണ് നടക്കുക. കേരളോത്സവത്തില്‍ ഏറ്റവും കൂടുതല്‍ പോയിന്റ് നേടുന്ന ക്ലബ്ബുകള്‍ക്ക് ബ്ലോക്ക് ,നഗരസഭ, കോര്‍പ്പറേഷന്‍, ജില്ലാ, സംസ്ഥാന തലത്തില്‍ ക്യാഷ് അവാര്‍ഡും നല്‍കും.