കല്‍പ്പറ്റ: കേരള-കര്‍ണാടക സംസ്ഥാനങ്ങളെ ബന്ധിപ്പിക്കുന്ന ദേശീയ പാതയിലൂടെയുള്ള രാത്രിയാത്രാ വിലക്ക് നീക്കുന്നതിനും ലക്കിടി മുതല്‍ അടിവാരം വരെയുള്ള ചുരം റോഡ് ഗതാഗത യോഗ്യമാക്കാനും ആവശ്യമായ നടപടികള്‍ ത്വരിതഗതിയിലാക്കണമെന്ന് മുസ്‌ലിം സര്‍വിസ് സൊസൈറ്റി (എം.എസ്.എസ്) ജില്ലാ ജനറല്‍ ബോഡി ആവശ്യപ്പെട്ടു.
ലക്കിടി മുതല്‍ അടിവാരം വരെയുള്ള ചുരം റോഡ് പൂര്‍ണമായും തകര്‍ന്നിരിക്കുകയാണ്. ഗതാഗത തടസം മണിക്കൂറുകളോളം നീണ്ടുനില്‍ക്കുന്നു. ഒന്‍പത് പ്രധാന വളവുകളില്‍ ആറെണ്ണത്തിലും വന്‍ കുഴികള്‍ രൂപപ്പെട്ടു കിടക്കുകയാണ്. ഇരുപത്തിനാല് ചെറുതും വലുതുമായ വളവുകളില്‍ 16 ഇടങ്ങളില്‍ പൂര്‍ണ്ണമായും 8 ഇടങ്ങളില്‍ ഭാഗികമായും റോഡ് തകര്‍ന്നിരിക്കുകയാണ്.
വളവുകളിലുണ്ടായ കിടങ്ങുകളും ചാലുകളും കുഴികളും കാരണം ഗതാഗതം ദുരിതപൂര്‍ണമാണ്. ചുരംറോഡ് ഗതാഗത യോഗ്യമാക്കാനും അടിക്കടിയുണ്ടാവുന്ന ഗതാഗത തടസം നീക്കാനും അടിയന്തര ഇടപെടല്‍ വേണം.
വയനാടിന്റെ വികസനത്തിന് റയില്‍വേ പദ്ധതി യാഥാര്‍ഥ്യമാക്കുക, ആരോഗ്യ സംരക്ഷണത്തിനായി ജില്ലക്കനുവദിച്ച സര്‍ക്കാര്‍ മെഡിക്കല്‍ കോളജിന്റെ നിര്‍മാണത്തിനാവശ്യമായ തുക അനുവദിക്കണമെന്നും യോഗം ആവശ്യപ്പെട്ടു.
ജില്ലാ ജനറല്‍ ബോഡി യോഗം മുന്‍ സംസ്ഥാന ജനറല്‍ സെക്രട്ടറി പി.ടി മൊയ്തീന്‍ കുട്ടി ഉദ്ഘാടനം ചെയ്തു. ജില്ലാ പ്രസിഡന്റ് കെ അബ്ദുല്ല താനേരി അധ്യക്ഷനായി.