മേപ്പയ്യൂര്‍: പാലച്ചുവട് മുയിപ്പോത്ത് റോഡില്‍ വിയ്യംചിറ പാലത്തിന് സമീപമുള്ള ട്രാന്‍സ്‌ഫോര്‍മര്‍ ജനങ്ങള്‍ക്ക് ഭീഷണിയാവുന്നു. തൊട്ടടുത്ത എ.വി അബ്ദുറഹ്മാന്‍ ഹാജി മെമ്മോറിയല്‍ ആര്‍ട്‌സ് ആന്‍ഡ് സയന്‍സ് കോളജിലേക്ക് ഉള്‍പ്പെടെ നിരവധി വിദ്യാര്‍ഥികള്‍ സഞ്ചരിക്കുന്ന റോഡാണിത്. ഉയരത്തിലുള്ള പ്ലാറ്റ് ഫോറത്തിലാണ് സാധാരണ ട്രാന്‍സ്‌ഫോര്‍മര്‍ സ്ഥാപിക്കാറുള്ളത്.
എന്നാല്‍ ഇവിടെ തറനിരപ്പിലാണ് സ്ഥാപിച്ചത്. മാത്രമല്ല ട്രാന്‍സ്‌ഫോര്‍മറിന് ചുറ്റും സംരക്ഷണ വേലിയും ഇല്ല. നേരത്തെ വീതി കുറഞ്ഞ മണ്‍പ്പാതയായിരുന്നപ്പോഴാണിവിടെ ട്രാന്‍സ്‌ഫോര്‍മര്‍ സ്ഥാപിച്ചത്. എന്നാല്‍ റോഡ് വീതി കൂട്ടുകയും ടാറിങ് നടത്തുകയും ചെയ്തപ്പോഴൊന്നും ഇത് പിറകോട്ട് മാറ്റി സ്ഥാപിക്കാന്‍ കെ.എസ്.ഇ.ബി അധികൃതര്‍ തയാറായില്ല.
പയ്യോളി ഇലക്ട്രിക്കല്‍ സെക്ഷന്റെ പരിധിയിലുള്ള ഈ ട്രാന്‍സ്‌ഫോര്‍മര്‍ മാറ്റി സ്ഥാപിക്കണമെന്ന് ആവശ്യപ്പെട്ട് നിരവധി തവണ പരാതി നല്‍കിയിട്ടും പരിശോധിക്കാന്‍ പോലും കെ.എസ്.ഇ.ബി തയാറായിട്ടില്ലെന്നാണ് നാട്ടുകാര്‍ ആരോപിക്കുന്നത്.