പൊന്നാനി: കുറ്റിപ്പുറത്തു വെച്ച് കഴിഞ്ഞ ദിവസം രാത്രി ട്രാന്‍സ്‌ജെന്‍ഡര്‍ യുവതിയെ ക്രൂരമായി മര്‍ദിച്ചു. രാത്രി 2.20 നാണ് സംഭവം.നീലാഞ്ജന എന്ന ട്രാന്‍സ് യുവതിയെയാണ് വൈറ്റ് ആള്‍ട്ടോ കാറില്‍ എത്തിയ മൂന്ന് യുവാക്കള്‍ കാറില്‍ കയറാന്‍ നിര്‍ബന്ധിക്കുകയും അത് നിരസിച്ചതിനെ തുടര്‍ന്ന് നെഞ്ചില്‍ ചവിട്ടി റോഡില്‍ ഇടുകയും കയ്യിലുണ്ടായിരുന്ന മൊബൈല്‍ ഫോണും 4800 രൂപയും ഐഡന്റിറ്റി രേഖകളുമടങ്ങുന്ന പേഴ്‌സ് തട്ടിപ്പറിക്കുകയും ചെയ്തത്.
'നിങ്ങളെ പോലുള്ളവരെ ജീവിക്കാന്‍ അനുവദിക്കുക ഇല്ലെന്നും, എവിടെ വെച്ച് കണ്ടാലും പിടിച്ച് ബലാത്സംഗം ചെയ്യുമെന്നും അക്രമികള്‍ ഭീഷണിപ്പെടുത്തി. തുടര്‍ന്ന് ജെന്റര്‍ ഐഡന്റിറ്റിയെ ചോദ്യം ചെയ്യുകയും കേട്ടാലറക്കുന്ന ഭാഷയില്‍ തെറി പറയുകയും ചെയ്തതായി പരുക്കേറ്റ യുവതി പറയുന്നു. പരുക്കേറ്റ യുവതിയെ കുറ്റിപ്പുറം ഗവ. ഹോസ്പിറ്റലില്‍ പ്രവേശിപ്പിക്കുകയും ആവശ്യമായ ചികിത്സ നല്‍കുകയും ചെയ്തു. കുറ്റിപ്പുറം പൊലിസ് സ്റ്റേഷനില്‍ എത്തി പരാതി നല്‍കിയെങ്കിലും ഫലമുണ്ടായിട്ടില്ലെന്ന് യുവതി പറഞ്ഞു.