മഞ്ചേരി: ആകാശവാണി എഫ്.എം നിലയങ്ങളിലെ ശബ്ദസംവിധാനത്തിന് നിയന്ത്രണം. സ്വകാര്യ എഫ്.എം നിലയങ്ങള്‍ ഉള്ളിടങ്ങളില്‍ മാത്രം സ്റ്റീരിയോ ശബ്ദം മതിയെന്നും അല്ലാത്ത നിലയങ്ങള്‍ പരമ്പരാഗത രീതിയിലെ ശബ്ദ സംവിധാനത്തിലേക്ക് മാറണമെന്നും അഖിലേന്ത്യ തലത്തില്‍ ആകാശവാണി തീരുമാനമെടുത്തു. എന്നാല്‍ പുതിയ തീരുമാനം മഞ്ചേരി, ദേവികുളം നിലയങ്ങള്‍ക്ക് തിരിച്ചടിയാകും. സ്റ്റീരിയോ ശബ്ദസംവിധാനം പ്രസരണ ശേഷി കുറയുകയാണെന്നും പരമ്പരാഗത രീതിയില്‍ സംവിധാനം ശേഷി കൂട്ടുന്നുണ്ടെന്നുമാണ് അഖിലേന്ത്യാ തലത്തില്‍ നടത്തിയ സര്‍വേയിലെ കണ്ടെത്തല്‍.
12 വര്‍ഷം മുന്‍പ് ആരംഭിച്ച മഞ്ചേരി എഫ്.എം നിലയത്തില്‍ തുടക്കം മുതല്‍ സ്റ്റിരി കോ ശബ്ദത്തിലാണ് പരിപാടികള്‍ കേള്‍വിക്കാരില്‍ എത്തിക്കുന്നത്.
മഞ്ചേരിയിലെ നിലയം ഉയര്‍ന്ന പ്രദേശത്ത് ആയതിനാല്‍ ലക്ഷ്യമിട്ടതിന്റെ പത്തിരട്ടിയോളം ദൂരപരിധിയില്‍ ശബ്ദം എത്തുന്നുണ്ട്. സ്റ്റീരിയോ ആയതിനാല്‍ വാഹനങ്ങളിലടക്കം പ്രചാരവുമുണ്ട്. പരമാവധി 40 കിലോമീറ്റര്‍ ചുറ്റളവില്‍ ശബ്ദം എത്താനുള്ള സംവിധാനം ആണെങ്കിലും നിലയം ഉയര്‍ന്ന പ്രദേശത്ത് ആയതിനാല്‍ ആറ് ജില്ലകളിലും തമിഴ്‌നാട്ടിലെ നീലഗിരി ജില്ലയിലും പരിസരങ്ങളിലും മഞ്ചേരി നിലയത്തിലെ കലാപരിപാടികള്‍ ലഭിക്കുന്നുണ്ട്. സംസ്ഥാനത്തെ എട്ട് എഫ്.എം നിലയങ്ങളിലും ഇപ്പോള്‍ സ്റ്റിരിയോ സംവിധാനമാണ് നിലവിലുള്ളത്.
സംസ്ഥാനത്ത് ഏറ്റവും കൂടുതല്‍ പരസ്യവരുമാനം ഉണ്ടാക്കുന്നത് മഞ്ചേരിയിലെ എഫ്.എം നിലയമാണ്. ശ്രോതാക്കളുടെ ബാഹുല്യമാണ് പരസ്യ വരുമാനത്തില്‍ വര്‍ധനവ് ഉണ്ടാകാന്‍ കാരണം. എന്നാല്‍ സ്റ്റിരിയോ സംവിധാനം ഒഴിവാക്കുന്നതോടെ ശ്രോതാക്കള്‍ കുറയാന്‍ കാരണമാകുമെന്ന ആശങ്കയും വ്യാപകമാണ്. സ്റ്റീരിയോ സംവിധാനം നിലനിര്‍ത്തിക്കൊണ്ടുതന്നെ പ്രസരണ ശേഷി മൂന്നില്‍ നിന്നും പത്തുകിലോവാട്ടാക്കി ഉയര്‍ത്തുകയാണ് വേണ്ടതെന്ന ആവശ്യമാണ് ഉയരുന്നത്. സ്റ്റിരിയോ സംവിധാനം ഒഴിവാക്കുന്നതിനെതിരെ എഫ്.എം സംരക്ഷണസമിതി പ്രതിഷേധവുമായി രംഗത്തെത്തിയിട്ടുണ്ട്. തുടക്കം മുതലുള്ള രീതിതന്നെ ഉപയോഗിച്ച് ശ്രോതാക്കളെ ആകര്‍ഷിപ്പിക്കാന്‍ നടപടി സ്വീകരിക്കണമെന്നാവശ്യപ്പെട്ട് സംരക്ഷണസമിതിയുടെ നേതൃത്വത്തില്‍ ആകാശവാണി ചീഫ് എന്‍ജിനിയര്‍ക്ക് പരാതി നല്‍കി. പ്രതിഷേധ സംഗമത്തില്‍ സമിതി ചെയര്‍മാന്‍ ജയപ്രകാശ് കാമ്പുറം അധ്യക്ഷനായി. കണ്‍വീനര്‍ രവീന്ദ്രന്‍ മംഗലശ്ശേരി, എന്‍.മുഹമ്മദ്, അഡ്വ.ബിജു ജോണ്‍, വി.വേണുഗോപാലന്‍ എന്നിവര്‍ സംബന്ധിച്ചു.