പേങ്ങാട്ടിരി: ജീവിതയാത്രയില്‍ പല കാരണങ്ങള്‍കൊണ്ട് നിറം മങ്ങിയവര്‍ക്ക് പ്രകൃതിയുടെ നിറങ്ങളാസ്വദിക്കാന്‍ നെല്ലായ പഞ്ചായത്ത് പെയിന്‍ ആന്‍ഡ് പാലിയേറ്റീവ് കെയര്‍യൂണിറ്റും പ്രൈമറി ഹെല്‍ത്ത് സെന്ററും ചേര്‍ന്ന് മലമ്പുഴ ഉദ്യാനത്തിലേക്ക് സ്‌നേഹസംഗമ യാത്ര നടത്തി. നാല്പതോളം അംഗങ്ങളും അവരുടെ രക്ഷിതാക്കളും അടക്കം നൂറ്റി അന്‍പതോളം പേര്‍ അടങ്ങിയ സംഘത്തെ പഞ്ചായത്ത് പ്രസിഡന്റ്, മറ്റു മെംബര്‍മാര്‍, ആശാവര്‍ക്കര്‍മാര്‍, ഹെല്‍ത്ത് ഹെന്റര്‍ ജീവനക്കാര്‍ തുടങ്ങിയവര്‍ അനുഗമിച്ചു. കൈത്താങ്ങാവാനും കൂടെനടക്കാനും ചെര്‍പ്പുളശ്ശേരി എം.ഇ.എസ് കോളജിലെ വിദ്യാര്‍ഥികളും അധ്യാപകരുമുണ്ടായിരുന്നു. പാലക്കാട് കോട്ടയും ഭിന്നശേഷി സൗഹൃദപാര്‍ക്കായി അടുത്തിടെ പ്രഖ്യാപിച്ച വാടിക പാര്‍ക്കും കണ്ട് വൈകുന്നേരത്തോടെയായിരുന്നു ഇവരുടെ മടക്കം. ഇത് രണ്ടാം തവണയാണ് ഈ യാത്ര സംഘടിപ്പിക്കുന്നത്. കഴിഞ്ഞ വര്‍ഷം വാഴാനി, പൂയല ഡാം എന്നിവിടങ്ങളിലേക്കായിരുന്നു യാത്ര.