മാനന്തവാടി: കാറില്‍ ലിഫ്റ്റ് നല്‍കി വിദ്യാര്‍ഥിനിയെ പീഡിപ്പിക്കാന്‍ ശ്രമിച്ച സംഭവത്തില്‍ യുവാവിനെതിരേ പൊലിസ് കേസെടുത്തു.
കാട്ടികുളം-പാല്‍വെളിച്ചം ഇടത്തിട്ടയില്‍ ഷില്‍രാജ് (28) നെതിരെയാണ് തിരുനെല്ലി പൊലിസ് കുട്ടികള്‍ക്കെതിരെയുള്ള ലൈംഗീക അതിക്രമം തടയല്‍ (പോക്‌സോ) വകുപ്പ് പ്രകാരവും പീഡന ശ്രമത്തിനുള്ള വകുപ്പ് പ്രകാരവും കേസെടുത്തത്.
ഇയാള്‍ പൊലിസ് കസ്റ്റഡിയിലാണ്. ബുധനാഴ്ച രാവിലെ സ്‌കൂളിലേക്ക് പോവുകയായിരുന്ന പരിചയത്തിലുള്ള പ്ലസ് വണ്‍ വിദ്യാര്‍ഥിനിയെ ഷില്‍രാജ് കാറില്‍ കയറ്റിയ ശേഷം യാത്രാമധ്യേ കുട്ടിയെ കയറിപ്പിടിച്ച് പീഡിപ്പിക്കാന്‍ ശ്രമിച്ചതായാണ് പരാതി. തുടര്‍ന്ന് കുട്ടി കാറില്‍ നിന്നും ഇറങ്ങിയോടി സ്‌കൂള്‍ അധ്യാപകരോട് കാര്യങ്ങള്‍ വിശദീകരിക്കുകയുമായിരുന്നു.
സ്‌കൂളിലെ പ്രധാനധ്യാപകന്‍ മുഖേനെ പിന്നീട് തിരുനെല്ലി പൊലിസില്‍ നല്‍കിയ പരാതിയുടെ അടിസ്ഥാനത്തിലാണ് പൊലിസ് കേസ് രജിസ്റ്റര്‍ ചെയ്തത്.
പ്രതിയുടെ കാറും പൊലിസ് കസ്റ്റഡിയിലെടുത്തിട്ടുണ്ട്.