റിയാദ്: തൊഴില്‍ ലഭിക്കുന്നതിനായി സമര്‍പ്പിച്ച പ്രവൃത്തിപരിചയ സര്‍ട്ടിഫിക്കറ്റുകള്‍ വ്യാജമാണെന്ന് കണ്ടെണ്ടത്തിയതിനെ തുടര്‍ന്ന് ഏഴ് മലയാളി നഴ്‌സുമാര്‍ പിടിയിലായതായി റിപ്പോര്‍ട്ട്.
കിഴക്കന്‍ പ്രവിശ്യയിലെ ദമാമിലെ നാല് പ്രമുഖ ആശുപത്രിയില്‍ ജോലി ചെയ്യുന്നവരെയാണ് ക്രമിനല്‍ക്കുറ്റം ചുമത്തി അറസ്റ്റ് ചെയ്തത്.
ജോലിക്ക് കയറിയ ശേഷം ആറീജിയ മന്ത്രാലയം നടത്തിയ സൂക്ഷ്മപരിശോധനയിലാണ് ഇവര്‍ സമര്‍പ്പിച്ച രേഖകള്‍ വ്യാജമാണെന്ന് കണ്ടെണ്ടത്തിയത്.
പിടിക്കപ്പെട്ടവരില്‍ മൂന്ന് പേര്‍ കോട്ടയം ജില്ലയില്‍ നിന്നുള്ളവരും രണ്ടുപേര്‍ കൊല്ലം ജില്ലയില്‍ നിന്നുള്ളവരുമാണ്. കോഴിക്കോട്, മലപ്പുറം ജില്ലകളില്‍ നിന്നുള്ള ഓരോരുത്തരും ഇതിലുള്‍പ്പെടും. ഇവരുടെ വിവരങ്ങള്‍ ആശുപത്രി അധികൃതര്‍ പുറത്തുവിട്ടിട്ടില്ല.
ആശുപത്രി ജോലികള്‍ക്ക് വിസകള്‍ ശരിയാക്കി നല്‍കുന്ന ഏജന്റുമാരുടെ കബളിപ്പിക്കലാണ് ഉദ്യോഗാര്‍ഥികള്‍ പിടിക്കപ്പെടാന്‍ കാരണമെന്നാണ് ആക്ഷേപം.
സഊദി ആരോഗ്യ മേഖലയില്‍ ജോലിക്ക് വരുന്നവര്‍ക്ക് നാട്ടില്‍ രണ്ടു വര്‍ഷം പ്രവൃത്തിപരിചയം വേണമെന്നാണ് നിബന്ധന. എന്നാല്‍ ഇത് മറികടക്കാനായി ഏജന്റുമാര്‍ മുഖേനയാണ് പലരും വ്യാജ സര്‍ട്ടിഫിക്കറ്റുകള്‍ കൈക്കലാക്കുന്നത്. സര്‍ട്ടിഫിക്കറ്റുകളുടെ പരിശോധനക്കായി സസൂക്ഷ്മ സംവിധാനമാണ് സഊദി തൊഴില്‍, മന്ത്രാലയങ്ങള്‍ തുടരുന്നത്.
സഊദിയില്‍ ആരോഗ്യ മേഖലയില്‍ 2005 ന് ശേഷം വന്നവരുടെ വിദ്യാഭ്യാസ സര്‍ട്ടിഫിക്കറ്റുകളും പ്രവൃത്തി പരിചയ സര്‍ട്ടിഫിക്കറ്റുകളും ആരോഗ്യ മന്ത്രാലയം കഴിഞ്ഞ വര്‍ഷം ശേഖരിച്ച് പരിശോധനക്ക് വിധേയമാക്കിയിരുന്നു. ഇതിലാണ് പലരും സംശയത്തിന്റെ നിഴലില്‍ ഉള്‍പ്പെട്ടത്.
ആരോഗ്യ മന്ത്രാലയം പരിശോധന ശക്തമാക്കിയതോടെ നിരവധി പേരാണ് ആശങ്കയിലായത്.
പിടിക്കപ്പെടുന്നവരെ ക്രിമിനല്‍ക്കുറ്റം ചുമത്തി ജയിലിലടക്കുകയാണ് ചെയ്യുന്നത്.