ചെറുതുരുത്തി: വര്‍ഷങ്ങളുടെ പരിശീലനവും മെയ് വഴക്കവും വേണ്ട കഥകളിയില്‍ മൂന്നാം ക്ലാസുകാരന്‍ തീര്‍ത്തത് നടനവിസ്മയത്തിന്റെ അത്യപൂര്‍വ നിമിഷങ്ങള്‍. കലാമണ്ഡലം കൂത്തമ്പലത്തില്‍ തടിച്ചുകൂടിയ കാണികളുടെ നിലക്കാത്ത കരഘോഷത്തിനിടെയാണ് ഈ കൊച്ചുമിടുക്കന്‍ കഥകളി അവതരിപ്പിച്ചത്.
കോട്ടയം തിരുവഞ്ചൂര്‍ എല്‍.പി സ്‌കൂളിലെ അഭിജിത്ത് ആണ് നവരാത്രിയാഘോഷങ്ങളുടെ ഭാഗമായി വിദ്യാര്‍ഥി യൂനിയന്‍ കൂത്തമ്പലത്തില്‍ നടത്തിവരുന്ന ആഘോഷ പരിപാടികളില്‍ പങ്കെടുത്ത് കഥകളി അവതരിപ്പിച്ചത്.
മൂന്നുവയസു മുതല്‍ കലാനിലയം വിജയന്റെ ശിക്ഷണത്തില്‍ കഥകളി അഭ്യസിക്കുന്ന അഭിജിത്ത് കോട്ടയം ജില്ലയിലെ കാരാപ്പുഴ സ്വദേശിയാണ്.