ഫറോക്ക്: എന്‍ജിന്‍ തകരാറിലായി കടലില്‍ കുടുങ്ങിയ മത്സ്യബന്ധന ബോട്ടിലെ അഞ്ചു തൊഴിലാളികളെ ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് വിഭാഗം രക്ഷപ്പെടുത്തി. ബേപ്പൂര്‍ കൊലവന്റകത്ത് വീട്ടില്‍ ഉദയ ദാസിന്റെ ഉടമസ്ഥതയിലുള്ള 'പൊന്നമ്പിളി' ബോട്ടാണ് ഇന്നലെ ഉച്ചയോടെ കടലില്‍ കുടുങ്ങിയത്.
ഇന്നലെ പുലര്‍ച്ചെ ബേപ്പൂരില്‍ നിന്നാണ് ഇവര്‍ മത്സ്യബന്ധനത്തിനു പോയത്.
താനൂരില്‍ നിന്നു 4.5 ഫാദം അകലെ കടലില്‍ മത്സ്യബന്ധനം തുടങ്ങാനിരിക്കെയാണ് എന്‍ജിന്‍ തകരാറിലായി ബോട്ടില്‍ വെള്ളം കയറാന്‍ തുടങ്ങിയത്. വിവരം ലഭിച്ചതിനെ തുടര്‍ന്ന് മറൈന്‍ എന്‍ഫോഴ്‌സ്‌മെന്റ് വിഭാഗം ബോട്ടുമായി ചെന്നാണ് രക്ഷാപ്രവര്‍ത്തനം നടത്തിയത്.
അഞ്ചു തൊഴിലാളികളെയും തകരാറിലായ ബോട്ടും സുരക്ഷതിമായി ബേപ്പൂരിലെത്തിച്ചു. രക്ഷപ്പെടുത്തിയവരില്‍ മൂന്നുപേര്‍ അസം സ്വദേശികളും രണ്ടു മലയാളികളുമാണ്. ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് സീനിയര്‍ സി.പി.ഒ പ്രവീണ്‍ രാജ്, സി.പി.ഒ അനീഷ് മൂസേന്‍വീട്, റസ്‌ക്യൂ ഗാര്‍ഡുമാരായ ഷൈജു, രാജേഷ്, താജുദ്ദീന്‍ എന്നിവരാണ് രക്ഷാപ്രവര്‍ത്തനം നടത്തിയത്.