ചെന്നൈ: വിവാദങ്ങള്‍ക്ക് വിരാമമായി. ആര്‍.കെ നഗര്‍ ഉപതെരഞ്ഞെടുപ്പില്‍ നടന്‍ വിശാലിന്റെ നാമനിര്‍ദേശ പത്രിക തെരഞ്ഞെടുപ്പു കമ്മിഷന്‍ തള്ളി. കഴിഞ്ഞ ദിവസം നടത്തിയ സൂക്ഷ്മ പരിശോധനയില്‍ വിശാലിനെ നാമനിര്‍ദേശം ചെയ്ത രണ്ടുപേര്‍ നല്‍കിയ വിവരം പൂര്‍ണമല്ലെന്ന് കണ്ട് പത്രിക തള്ളിയിരുന്നു. ഇതേ തുടര്‍ന്ന് റോഡ് ഉപരോധിച്ച് പ്രതിഷേധിച്ച വിശാലിനെയും സംഘത്തെയും പൊലിസ് കസ്റ്റഡിയിലെടുക്കുകയും ചെയ്തിരുന്നു. തുടര്‍ന്ന് പത്രിക വീണ്ടും പരിശോധിക്കാനും വിശാലിന്റെ പരാതി പരിഗണിക്കാമെന്നും തെരഞ്ഞെടുപ്പ് കമ്മിഷന്‍ അറിയിച്ചതിനെ തുടര്‍ന്നാണ് പ്രക്ഷോഭം അവസാനിച്ചത്. എന്നാല്‍ ഇന്നലെ വീണ്ടും നടത്തിയ പരിശോധനയിലാണ് പത്രിക അപൂര്‍ണമാണെന്ന് കണ്ട് തള്ളിയത്. എന്നാല്‍ തന്റെ പത്രിക തള്ളിയതുവഴി ജനാധിപത്യം അവഹേളിക്കപ്പെട്ടുവെന്ന് വിശാല്‍ ആരോപിച്ചു.
ഇന്നലെ പത്രിക സൂക്ഷ്മ പരിശോധനക്ക് വിധേയമാക്കിയ റിട്ടേണിങ് ഓഫിസര്‍ കെ. വേലുച്ചാമിയാണ് അവസാനം പത്രിക തള്ളിയതായി അറിയിച്ചത്. വിശാലിനെ നാമനിര്‍ദേശം ചെയ്ത പത്തുപേരില്‍ രണ്ടുപേര്‍ നല്‍കിയ വിവരം വ്യാജമാണെന്ന് കണ്ടെത്തിയിട്ടുണ്ട്.
എന്നാല്‍ ഇതിനെതിരേ നിയമ നടപടി സ്വീകരിക്കുമെന്ന് വിശാല്‍ അറിയിച്ചു. ഉപതെരഞ്ഞെടുപ്പില്‍ മത്സരിക്കുന്നതിനായി സമര്‍പ്പിച്ച നാമനിര്‍ദേശ പത്രികകളില്‍ 70 എണ്ണം തള്ളിയതായി റിട്ടേണിങ് ഓഫിസര്‍ വേലുച്ചാമി അറിയിച്ചു. പത്രിക പിന്‍വലിക്കുന്നതിനുള്ള അവസാന തീയതി ഇന്നാണ്. മണ്ഡലത്തില്‍ 2,28,234 വോട്ടര്‍മാരാണുള്ളത്. ഇവരില്‍ 1.17 ലക്ഷം വോട്ടര്‍മാര്‍ സ്ത്രീകളാണ്.