പാലക്കാട്: ഒലവക്കോട് യുവതിയെ തീക്കൊളുത്തിക്കൊല്ലാന്‍ ഭര്‍ത്താവിന്റെ ശ്രമം. മലമ്പുഴ തെക്കേമലമ്പുഴ സ്വദേശി ബാബുരാജ് (48) ആണ് ഭാര്യ സരിതയെ കൊലപ്പെടുത്താന്‍ ശ്രമിച്ചത്.

രാവിലെ 11.30 ന് ഒലവക്കോടാണ് സംഭവം. ബ്യൂട്ടീഷ്യന്‍ കോഴ്സ് വിദ്യാര്‍ഥിനിയായ സരിതയുടെ ക്ലാസ് മുറിയിലെത്തിയ ശേഷമായിരുന്നു ബാബുരാജിന്റെ ആക്രമണം. സരിതയുടെ ദേഹത്ത് ബാബുരാജ് പെട്രോള്‍ ഒഴിച്ച് തീകൊളുത്താന്‍ ശ്രമം നടത്തി. യുവതി ഓടിമാറുകയായിരുന്നു.

സംഭവസ്ഥലത്തുനിന്ന് രക്ഷപ്പെട്ട ബാബുരാജ് പിന്നീട് മലമ്പുഴ സ്റ്റേഷനില്‍ കീഴടങ്ങി. കുടുംബപ്രശ്‌നങ്ങളാണ് സംഭവത്തിന് പിന്നിലെന്ന് പൊലിസ് പറഞ്ഞു.

സരിതയെ അടുത്തുള്ള ആശുപത്രിയില്‍ പ്രവേശിപ്പിച്ചിരിക്കുകയാണ്. ഇവര്‍ക്ക് ഗുരുതര പരിക്കുകള്‍ ഇല്ലെന്നാണ് വിവരം.