കൊച്ചി: കേരളത്തില്‍ ഇപ്പോള്‍ ലഭിക്കുന്നത് 10 ശതമാനം എഥനോള്‍ ചേര്‍ത്ത പെട്രോള്‍. പ്രകൃതിസൗഹൃത ഇന്ധനമെന്ന പദ്ധതി പ്രകാരമാണ് പെട്രോളില്‍ എഥനോള്‍ ചേര്‍ക്കാന്‍ ആരംഭിച്ചത്. കഴിഞ്ഞയാഴ്ച മുതലാണ് കേരളത്തില്‍ എഥനോള്‍ ചേര്‍ത്തു തുടങ്ങിയത്.

ഉപയോക്താക്കളുടെ ശ്രദ്ധയ്ക്ക്

• വാനഹ ടാങ്കില്‍ വെള്ളത്തിന്റെ ചെറിയൊരു അംശം ഉണ്ടായാല്‍ പോലും അത് എഥനോളുമായി കലരും. ഇങ്ങനെ സംഭവിച്ചാല്‍ വാഹനം സ്റ്റാര്‍ട്ട് ചെയ്യുന്നതിനടക്കം ബുദ്ധിമുട്ടുകള്‍ നേരിടും.
• നീരാവി മൂലമോ അല്ലാതെയോ ടാങ്കിന്റെ ഏറ്റവും താഴെ ചെറിയ തോതില്‍ ജലാംശം ഉണ്ടാകാനുള്ള സാധ്യതയുണ്ട്. അതിനാല്‍ ഇന്ധനം പൂര്‍ണമായും തീരുന്നതിനു മുന്‍പുതന്നെ വീണ്ടും നിറയ്ക്കുക.
• സാധാരണ പെട്രോളില്‍ ജലാംശം ഉണ്ടെങ്കില്‍ പെട്രോളിന്റെ താഴെയായി അടിയും. എന്നാല്‍ എഥനോള്‍ കലത്തിയ പെട്രോളില്‍ ജലാംശം കൂടുതല്‍ ലയിക്കും. ഇത് കാരണമാണ് വാഹനത്തിന് കേടുപാടുകള്‍ വരാന്‍ സാധ്യത.

മറ്റു സംസ്ഥാനങ്ങളില്‍ മുന്‍പു തന്നെ എഥനോള്‍ ചേര്‍ക്കാന്‍ തുടങ്ങിയിരുന്നു. ഇതോടെ ജനങ്ങള്‍ വെള്ളം ചേര്‍ക്കുന്നുവെന്ന പരാതിയും ഉയര്‍ന്നിരുന്നു. ഇതു മുന്നില്‍ക്കണ്ട് ബോധവത്ക്കരണം നടത്താനും പെട്രോളിയം കമ്പനികള്‍ തീരുമാനിച്ചിട്ടുണ്ട്.

പഞ്ചസാര വ്യവസായത്തിന്റെ ഉപോല്‍പന്നമാണ് ബയോ ഇന്ധനമായ എഥനോള്‍. ക്രൂഡ് ഓയില്‍ ഇറക്കുമതി കുറയ്ക്കുക, കരിമ്പ് കര്‍ഷകരെ സഹായിക്കുക, മലിനീകരണം കുറയ്ക്കുക എന്നീ ലക്ഷ്യങ്ങളോടെയാണ് എഥനോള്‍ ചേര്‍ക്കാന്‍ ആരംഭിച്ചത്. ഇപ്പോള്‍ 10 ശതമാനമാണെങ്കിലും 2025 ഓടെ പെട്രോളില്‍ 20 ശതമാനം എഥനോല്‍ ചേര്‍ക്കുകയാണ് ലക്ഷ്യം.