തിരുവനന്തപുരം: തൃക്കാക്കരയില്‍ ഇടതു സ്ഥാനാര്‍ഥിയെ ഇന്ന് പ്രഖ്യാപിക്കും. സി.പി.എം ജില്ലാ സെക്രട്ടറിയേറ്റും തുടര്‍ന്ന് ജില്ലാ കമ്മറ്റിയും ഇന്ന് ചേരുന്നുണ്ട്. കൊച്ചി മേയര്‍ എം അനില്‍കുമാര്‍, ജില്ല കമ്മിറ്റിയംഗം കെ എസ് അരുണ്‍ കുമാര്‍, കൊളേജ് അധ്യാപിക കൊച്ചു റാണി ജോസഫ് എന്നിവരെയാണ് പരിഗണിക്കുന്നത്.

നിയമസഭയില്‍ നൂറു സീറ്റ് തികയ്ക്കുക എന്ന ലക്ഷ്യത്തോടെയാണ് കോണ്‍ഗ്രസിന്റെ പൊന്നാപുരം കോട്ടയായ തൃക്കാക്കരയില്‍ സി.പി.എം മത്സരിക്കാനൊരുങ്ങുന്നത്.

ഔദ്യോഗിക പ്രഖ്യാപനത്തിന് മുന്‍പേ സ്ഥാനാര്‍ഥിയുടെ പേര് പുറത്തുവിടേണ്ടെന്ന നിര്‍ദ്ദേശമാണ് നേതൃത്വം നല്‍കിയിരിക്കുന്നത്.

ഉപതിരഞ്ഞെടുപ്പിന്റെ പ്രചാരണ ചുമതല എല്‍ഡിഎഫ് കണ്‍വീനര്‍ ഇ.പി ജയരാജനാണ്. സംസ്ഥാന സര്‍ക്കാരിന്റെ വികസന നേട്ടങ്ങള്‍ ജനങ്ങള്‍ക്ക് മുന്നില്‍ അവതരിപ്പിച്ച് വോട്ട് ചോദിക്കാനാണ് നീക്കം. സിപിഎം സംസ്ഥാന സെക്രട്ടേറിയറ്റ് അംഗങ്ങള്‍ മണ്ഡലം കേന്ദ്രീകരിച്ച് പ്രവര്‍ത്തിക്കും.

2019 ലോക്സഭ തിരഞ്ഞെടുപ്പിന് ശേഷം നടന്ന ഉപതിരഞ്ഞെടുപ്പില്‍ യുഡിഎഫിന്റെ കുത്തക മണ്ഡലങ്ങളായ പാലാ, കോന്നി, വട്ടിയൂര്‍ക്കാവ് എന്നിവിടങ്ങളില്‍ വിജയം നേടാനായതിന്റെ അനുഭവം ഇടതുമുന്നണിക്ക് ആത്മവിശ്വാസം നല്‍കും. മണ്ഡലത്തില്‍ 45,000 വോട്ടുകള്‍ എല്ലാ കാലത്തും ഇടത് മുന്നണിക്ക് ലഭിക്കുന്നതുമാണ്.