കൊച്ചി: നഗരത്തിനകത്ത് സ്വകാര്യബസുകളുടെ ഹോണടി നിയന്ത്രണവുമായി ഹൈക്കോടതി. സ്വകാര്യബസുകള്‍ നഗരത്തില്‍ ഹോണ്‍ മുഴക്കുന്നത് നിരോധിക്കണമെന്നാണ് ഹൈക്കോടതിയുടെ നിര്‍ദേശം. ജസ്റ്റിസ് അമിത് റാവലിന്റെ ബെഞ്ചില്‍ നിന്നാണ് നിര്‍ദേശം. പെരുമ്പാവൂര്‍ നഗര പരിധിയിലെ ഓട്ടോകളുടെ പെര്‍മിറ്റുമായി ബന്ധപ്പെട്ട് ഹരജികള്‍ പരിഗണിച്ചാണ് ഉത്തരവ്. ഇത് സംബന്ധിച്ച് ഉത്തരവിറക്കാന്‍ പൊലിസ് കമ്മിഷണര്‍ക്കും മോട്ടോര്‍ വാഹനവകുപ്പിനും കോടതി നിര്‍ദേശവും നല്‍കി.

അതേസമയം ബസുകള്‍ക്ക് പുറമേ ഓട്ടോകള്‍ക്കും നിയന്ത്രണം ബാധകമാക്കിയേക്കും. സ്വകാര്യബസുകള്‍ റോഡിന്റെ ഇടതുവശം ചേര്‍ന്ന് പോകണം. ഓവര്‍ടേക്കിങ് പാടില്ലെന്നും ഹൈക്കോടതി വ്യക്തമാക്കി. വാഹനങ്ങള്‍ക്കുള്ള നിയന്ത്രണം വേഗം കൊണ്ടുവരണമെന്നും കോടതി നിര്‍ദ്ദേശിച്ചു.