കല്‍പ്പറ്റ/കണ്ണൂര്‍: കുഴല്‍പ്പണ വിവാദത്തിന് പിന്നാലെ കോഴയാരോപണത്തിലും കുരുങ്ങി ബി.ജെ.പി. എല്‍.ഡി.എഫിന്റെ ഭാഗമായിരുന്ന സി.കെ ജാനുവിനേയും ജനാധിപത്യ രാഷ്ട്രീയ പാര്‍ട്ടിയേയും നിയമസഭാ തെരഞ്ഞെടുപ്പില്‍ എന്‍.ഡി.എയില്‍ എത്തിക്കാന്‍ ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രന്‍ കോഴ നല്‍കിയെന്ന് വ്യക്തമാക്കുന്ന ഫോണ്‍ സംഭാഷണങ്ങള്‍ പുറത്തുവന്നു. എന്‍.ഡി.എയില്‍ ചേരാന്‍ കെ.സുരേന്ദ്രന്‍ സമ്മര്‍ദ്ദം ചെലുത്തിയപ്പോള്‍ 10 കോടി രൂപയാണ് സി.കെ ജാനു ആവശ്യപ്പെട്ടതെന്നും എന്നാല്‍ 10 ലക്ഷം രൂപ നല്‍കി 'ഡീല്‍' ഉറപ്പിക്കുകയായിരുന്നുവെന്നുമാണ് ജെ.ആര്‍.പിയുടെ സംസ്ഥാന ട്രഷറര്‍ കൂടിയായ പ്രസീത അഴീക്കോടിന്റെ ആരോപണം. ഇതു തെളിയിക്കുന്ന കെ.സുരേന്ദ്രനും പ്രസീതയും തമ്മിലുള്ള ഫോണ്‍ സംഭാഷണത്തിന്റെ ഓഡിയോ ക്ലിപ്പും അവര്‍ കണ്ണൂരില്‍ പുറത്തുവിട്ടു.

സുരേന്ദ്രന്‍ നടത്തിയ ഫോണ്‍ സംഭാഷണത്തില്‍ സി.കെ ജാനുവിനെയും പാര്‍ട്ടിയെയും മുന്നണിയിലെത്തിക്കാന്‍ നടത്തിയ ശ്രമങ്ങള്‍ എണ്ണിയെണ്ണി പറയുന്നുണ്ട്. കെ.സുരേന്ദ്രന്റെ വിജയ് യാത്രയുടെ സമാപനത്തിനു മുന്നോടിയായി മാര്‍ച്ച് ആറിനാണ് ജാനുവിനു പണം നല്‍കിയതെന്നു പ്രസീത പറയുന്നു. പണം കിട്ടിയതോടെയാണ് അമിത് ഷാ പങ്കെടുത്ത തിരുവനന്തപുരത്തെ പരിപാടിക്കു ജാനു എത്തിയത്. സുരേന്ദ്രന്‍ ജാനുവിനു പണം കൊടുത്തതു തെരഞ്ഞെടുപ്പ് പ്രവര്‍ത്തനത്തിനല്ലെന്നും പ്രസീത പറയുന്നു. ഫോണ്‍ സംഭാഷണം ചോര്‍ന്നതോടെ കേരളത്തില്‍ നിയമസഭാ തെരഞ്ഞെടുപ്പ് അട്ടിമറിക്കാന്‍ ബി.ജെ.പി കള്ളപ്പണമൊഴുക്കിയെന്ന വസ്തുതയാണ് പുറത്തുവരുന്നത്.