റിയാദ്: ഗൾഫ് സഹകരണ കൗൺസിൽ (ജിസിസി) നിവാസികൾക്കായി സഊദി അറേബ്യ ഉടൻ പുതിയ വിസ പദ്ധതി അവതരിപ്പിക്കുമെന്ന് ടൂറിസം മന്ത്രി അഹമ്മദ് അൽ ഖത്തീബ് വെളിപ്പെടുത്തി. 2019-ൽ രാജ്യം ആരംഭിച്ച ടൂറിസ്റ്റ് വിസകൾ ഇപ്പോഴും നിലവിലുണ്ടെന്നും വിനോദസഞ്ചാരത്തിനായി വരുന്നവർക്ക് പ്രത്യേക നിയന്ത്രണങ്ങളില്ലെന്നും അൽ ഖത്തീബ് പറഞ്ഞു.

ബുധനാഴ്ച സിഎൻബിസി അറബിക്കിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം. 2021 ൽ രാജ്യത്ത് 64 ദശലക്ഷം ആഭ്യന്തര യാത്രകൾക്ക് സാക്ഷിയായതായും വിദേശത്ത് നിന്നുള്ള സന്ദർശകരുടെ എണ്ണം കഴിഞ്ഞ വർഷം 5 ദശലക്ഷത്തിലെത്തിയതായും അദ്ദേഹം പറഞ്ഞു.

പകർച്ചവ്യാധിയുടെ കാലത്ത് രാജ്യത്തെ ടൂറിസം മേഖല 40 ശതമാനം ചുരുങ്ങിയെന്ന് അദ്ദേഹം ചൂണ്ടിക്കാട്ടി. ദിരിയ പദ്ധതിയിലെ അൽ-ബുജൈരി ഏരിയ ഈ വർഷം തുറക്കുമെന്നാണ് പ്രതീക്ഷ.

തൊഴിലവസരങ്ങൾ സൃഷ്ടിക്കുന്നതിനുള്ള മേഖലയുടെ സംഭാവന 2019 ൽ 3 ശതമാനമായിരുന്നു, 2030 ഓടെ 10 ശതമാനത്തിലെത്താനാണ് സഊദി ലക്ഷ്യമിടുന്നത്. രാജ്യത്തിലെ തൊഴിൽ മേഖല 15 ശതമാനം വർധിച്ച് 2019-നും ഇപ്പോഴുമുള്ള ഇടയിൽ 820,000 തൊഴിലവസരങ്ങളായി, 2030-ഓടെ ടൂറിസം മേഖലയിൽ 200 ബില്യൺ ഡോളറിലധികം ചെലവഴിക്കാനാണ് ലക്ഷ്യമിടുന്നത്.

2030ഓടെ രാജ്യത്തിന്റെ ജിഡിപിയിൽ ഈ മേഖലയുടെ സംഭാവന 10 ശതമാനത്തിലെത്താനാണ് ലക്ഷ്യമെന്നും അദ്ദേഹം പറഞ്ഞു. 2019 സെപ്റ്റംബറിൽ ടൂറിസം സ്ട്രാറ്റജി ആരംഭിച്ചപ്പോൾ രാജ്യത്തിന്റെ ജിഡിപിയിൽ ടൂറിസം മേഖലയുടെ സംഭാവന 3 ശതമാനമായിരുന്നു.