ന്യൂഡല്‍ഹി: വിദേശത്ത് പോകേണ്ടവര്‍ക്ക് വാക്‌സിന്‍ ഡോസുകള്‍ തമ്മിലുള്ള ഇടവേള കുറച്ചു. ആദ്യ ഡോസ് സ്വീകരിച്ചു 28 ദിവസത്തിനുശേഷം രണ്ടാം ഡോസ് സ്വീകരിക്കാമെന്ന് കേന്ദ്രസര്‍ക്കാര്‍ പുതിയ മാര്‍ഗരേഖയില്‍ വ്യക്തമാക്കി. വിദേശത്ത് പഠനം, ജോലി ആവശ്യങ്ങള്‍ തുടങ്ങിയവയ്ക്ക് പോകുന്നവര്‍ക്കും ടോക്കിയോ ഒളിംപ്ക്‌സില്‍ പങ്കെടുക്കാന്‍ അവസരം ലഭിച്ച അത്‌ലറ്റുകള്‍ക്കുമാണ് ഇളവ്. ഓഗസ്റ്റ് 31വരെ രാജ്യാന്തര യാത്ര നടത്തുന്നവര്‍ക്കാണ് ഇളവ് ലഭിക്കുക.
ഇത്തരം യാത്രക്കാര്‍ക്ക് പാസ്‌പോര്‍ട്ടുമായി ലിങ്ക് ചെയ്ത വാക്‌സിനേഷന്‍ സര്‍ട്ടിഫിക്കറ്റ് ലഭിക്കും. നിലവില്‍ ലഭിച്ച വാക്‌സിനേഷന്‍ സര്‍ട്ടിഫിക്കറ്റില്‍ മറ്റേതെങ്കിലും തിരിച്ചറിയല്‍ രേഖയാണുള്ളതെങ്കില്‍ ഇവര്‍ക്ക് പാസ്‌പോര്‍ട്ട് നമ്പര്‍ ഉള്‍പ്പെടുത്തിയ പുതിയ സര്‍ട്ടിഫിക്കറ്റ് നല്‍കും. കൊവിഷീല്‍ഡ് വാക്‌സിന് മാത്രമാണ് ലോകാരോഗ്യ സംഘടനയുടെ അംഗീകാരമുള്ളതെന്നതിനാല്‍ സര്‍ട്ടിഫിക്കറ്റില്‍ കൊവിഷീല്‍ഡെന്ന് പ്രത്യേകം രേഖപ്പെടുത്താനും സംവിധാനമുണ്ടാകും.