പത്തനംതിട്ട: കുഞ്ഞിനെ തട്ടിക്കൊണ്ടുപോകാന്‍ ശ്രമിച്ച തമിഴ്‌നാട് സ്വദേശി സ്ത്രീ അറസ്റ്റില്‍. വെല്ലൂര്‍ സ്വദേശിനി മഞ്ജുവിനെ അടൂര്‍ പൊലിസാണ് അറസ്റ്റ് ചെയ്തത്. നാട്ടുകാര്‍ പിടികൂടിയപ്പോള്‍ ഊമയായി അഭിനയിക്കുകയായിരുന്നു. എന്നാല്‍ ഇവര്‍ക്ക് സംസാര ശേഷിയുള്ളതായി തെളിഞ്ഞു.
പത്തനംതിട്ട എനാദിമംഗലത്തെ ദമ്പതികളുടെ കുട്ടിയെയാണ് വെല്ലൂര്‍ സ്വദേശിയ സ്ത്രീ തട്ടിക്കൊണ്ടുപോകാന്‍ ശ്രമിച്ചത്. രാവിലെ സിറ്റൗട്ടില്‍ കളിച്ചുകൊണ്ടിരുന്ന മൂന്നരവയസുകാരനെ തട്ടിയെടുത്ത് ഓടുകയായിരുന്നു.

ഈ സമയം കുട്ടിയുടെ മാതാവ് വീടിനുള്ളിലും പിതാവ് വീടിനോടു ചേര്‍ന്നുള്ള വര്‍ക് ഷോപ്പിലുമായിരുന്നു. നാടോടി സ്ത്രീ കുട്ടിയെ എടുത്ത് വേഗത്തില്‍ പാഞ്ഞു. വര്‍ക് ഷോപ്പില്‍ ജോലി ചെയ്യുകയായിരുന്ന പിതാവ് പണിയായുധം എടുക്കുന്നതിനായി തിരിഞ്ഞപ്പോഴാണ് നാടോടി സ്ത്രീ കുട്ടിയുമായി ഓടുന്നത് കണ്ടത്. ഉടന്‍ ബഹളമുണ്ടാക്കിയതോടെ അവര്‍ കുട്ടിയെ ഉപേക്ഷിച്ച് ഓടി. തുടര്‍ന്ന് നാട്ടുകാര്‍ ഓടിച്ചിട്ട് പിടികൂടി പൊലിസിനെ ഏല്‍പിക്കുകയായിരുന്നു.