കുവൈറ്റില്‍ മലയാളീ യുവാവ് ഭാര്യയെ കുത്തിക്കൊലപ്പെടുത്തി കെട്ടിടത്തില്‍ നിന്നു വീണു മരിച്ച നിലയില്‍

പത്തനംതിട്ട: കുവൈറ്റില്‍ മലയാളി ദമ്പതികളെ മരിച്ച നിലയില്‍ കണ്ടെത്തി. പത്തനംതിട്ട പൂങ്കാവ് പൂത്തേത്ത് സൈജു സൈമണ്‍, ഭാര്യ ജീന എന്നിവരാണ് മരിച്ചത്. സൈജുവിനെ കെട്ടിടത്തില്‍നിന്നു വീണുമരിച്ച നിലയിലും ജീനയെ വീട്ടിനുള്ളില്‍ കുത്തേറ്റ് മരിച്ചനിലയിലുമാണു പൊലിസ് കണ്ടെത്തിയത്. ജീനയെ കൊലപ്പെടുത്തിയ ശേഷം സൈജു ഫഌറ്റിനുമുകളില്‍ നിന്ന് ചാടി ആത്മഹത്യ ചെയ്തതാകാമെന്നാണ് പൊലിസ് പറയുന്നത്. എന്നാല്‍ കൊലക്കുപിന്നിലെ കാരണം വ്യക്തമായിട്ടില്ല.

കുവൈറ്റിനടുത്ത സാല്‍മിയയിലാണ് സംഭവം. ഇവര്‍ താമസിക്കുന്ന കെട്ടിടത്തില്‍നിന്നു വീണു മരിച്ചനിലയില്‍ സൈജുവിനെയാണ് ആദ്യം കണ്ടത്. പൊലിസെത്തി ഫഌറ്റിന്റെ പൂട്ടു തകര്‍ത്ത് അകത്തു കയറിപ്പോള്‍ കുത്തേറ്റു മരിച്ചനിലയില്‍ ജീനയെ കണ്ടെത്തുകയായിരുന്നു.
ആരോഗ്യ വകുപ്പില്‍ ആംബുലന്‍സ് ഡ്രൈവറായിരുന്നു സൈജു. സാല്‍മിയ ഇന്ത്യന്‍ മോഡല്‍ സ്‌കൂളില്‍ ഐ.ടി ജീവനക്കാരിയാണ് ജീന. ഒരു വര്‍ഷം മുന്‍പാണ് ഇവര്‍ വിവാഹിതരായത്. ഇരുവരുടേതും പുനര്‍വിവാഹമായിരുന്നു.