ന്യൂഡല്‍ഹി: അന്തരിച്ച ലോക് ജനശക്തി പാര്‍ട്ടി (എല്‍.ജെ.പി) നേതാവ് രാംവിലാസ് പാസ്വാന്റെ മകന്‍ ചിരാഗ് പാസ്വാന് കനത്ത തിരിച്ചടിയായി ബിഹാര്‍ മുഖ്യമന്ത്രിയും ജെ.ഡി.യു നേതാവുമായ നിതീഷിന്റെ നീക്കങ്ങള്‍. എല്‍.ജെ.പിയിലെ ആറ് എം.പിമാരില്‍ അഞ്ചുപേരും പാര്‍ട്ടി വിട്ടു.
പ്രത്യേക ഗ്രൂപ്പായി തങ്ങളെ പരിഗണിക്കണമെന്നാവശ്യപ്പെട്ട് ഇവര്‍ ലോക്‌സഭാ സ്പീക്കര്‍ ഓം ബിര്‍ളയ്ക്ക് കത്തെഴുതി. ഇതോടെ ചിരാഗ് എല്‍.ജെ.പിയുടെ ഏക എം.പിയായി.
നിതീഷിന്റെ ഒത്താശയോടെ പാസ്വാന്റെ ഇളയ സഹോദരന്‍ പശുപതി കുമാര്‍ പരസാണ് അട്ടിമറിക്കു നേതൃത്വം നല്‍കിയത്. ഹാജിപുരില്‍നിന്നുള്ള എം.പിയായ പരസിന് മുഖ്യമന്ത്രി നിതീഷ് കുമാര്‍ കേന്ദ്രമന്ത്രിസ്ഥാനം വാഗ്ദാനം ചെയ്തതോടെയാണ് ചിരാഗിനെ ഒറ്റപ്പെടുത്തിയുള്ള നീക്കത്തിന് അദ്ദേഹം നേതൃത്വം നല്‍കിയത്.
ചിരാഗിന്റെ ബന്ധുവായ പ്രിന്‍സ് രാജ്, ചന്ദന്‍ സിങ്, വീണാ ദേവി, മഹ്ബൂബ് അലി കൈസര്‍ എന്നിവരാണ് പരസിനു പുറമെ പാര്‍ട്ടി വിട്ടത്.
പാസ്വാന്റെ മരണശേഷം കഴിഞ്ഞ വര്‍ഷമാണ് ചിരാഗ് എല്‍.ജെ.പി നേതൃസ്ഥാനം ഏറ്റെടുത്തത്. നിയമസഭാ തെരഞ്ഞെടുപ്പില്‍ എന്‍.ഡി.എ വിട്ട് തനിച്ചു മത്സരിക്കാനുള്ള ചിരാഗിന്റെ തീരുമാനത്തോടെയാണ് പാര്‍ട്ടിയില്‍ ഭിന്നത ഉടലെടുത്തത്. കഴിഞ്ഞവര്‍ഷം നടന്ന നിയമസഭാ തെഞ്ഞെടുപ്പില്‍ എന്‍.ഡി.എ വിട്ട ചിരാഗ് സ്വന്തമായി സ്ഥാനാര്‍ഥികളെ നിര്‍ത്തിയത് ജെ.ഡി.യുവിന് കനത്ത തിരിച്ചടിയായിരുന്നു.
നിയമസഭയിലെ അംഗബലത്തില്‍ ബി.ജെ.പിക്കും മുഖ്യപ്രതിപക്ഷമായ ആര്‍.ജെ.ഡിക്കും പിന്നില്‍ മൂന്നാം സ്ഥാനത്തേക്ക് ജെ.ഡി.യു പിന്തള്ളപ്പെടാനിടയാക്കിയത് ചിരാഗിന്റെ ഈ നീക്കമായിരുന്നു.
സ്വന്തമായി ഭൂരിപക്ഷമില്ലാതെ ബി.ജെ.പിക്കു കീഴ്‌പ്പെട്ട് സംസ്ഥാനം ഭരിക്കാന്‍ നിതീഷിനെ നിര്‍ബന്ധിതനാക്കിയ ചിരാഗിനോടുള്ള പകവീട്ടുകയായിരുന്നു അട്ടിമറിയിലൂടെ അദ്ദേഹം.