കോട്ടയം: നടന്‍ വി.പി.ഖാലിദിനെ മരിച്ച നിലയില്‍ കണ്ടെത്തി. എഴുപത് വയസായിരുന്നു. വൈക്കത്ത് ഷൂട്ടിങ്ങിനിടെ ശുചിമുറിയില്‍ വീണ നിലയില്‍ കണ്ടെത്തുകയായിരുന്നു. ആശുപത്രിയില്‍ എത്തിച്ചപ്പോഴേക്കും മരിച്ചു. ഫോര്‍ട്ട് കൊച്ചി സ്വദേശിയാണ്. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.
ആലപ്പി തിയറ്റേഴ്‌സില്‍ അംഗമായിരുന്ന അദ്ദേഹം നിരവധി നാടകങ്ങളില്‍ വേഷമിട്ടു. പിന്നീട് സംവിധായകന്‍, രചയിതാവ് എന്നീ നിലകളില്‍ തിളങ്ങി. 1973ല്‍ പുറത്തിറങ്ങിയ പെരിയാര്‍ ആയിരുന്നു ആദ്യ സിനിമ. താപ്പാന, അനുരാഗ കരിക്കിന്‍ വെള്ളം തുടങ്ങി നിരവധി സിനിമകളില്‍ ചെറിയ വേഷങ്ങള്‍ ചെയ്തു. മറിമായം എന്ന ഹാസ്യ പരിപാടിയിലെ സുമേഷേട്ടന്‍ എന്ന കഥാപാത്രം ശ്രദ്ധേയമായിരുന്നു.
സംവിധായകരായ ഷൈജു ഖാലിദ്, ഖാലിദ് റഹ്മാന്‍, ഛായാഗ്രാഹകന്‍ ജിംഷി ഖാലിദ് എന്നിവര്‍ മക്കളാണ്.