കല്‍പ്പറ്റ: വയനാട്ടിലെ രാഹുല്‍ ഗാന്ധി എം.പിയുടെ ഓഫിസ് ആക്രമിച്ച് എസ്.എഫ്.ഐ പ്രവര്‍ത്തകര്‍ ആക്രമിച്ചതിനെത്തുടര്‍ന്ന് സംസ്ഥാനത്തൊട്ടാകെ പ്രതിഷേധം കനക്കുന്നു. യൂത്ത് കോണ്‍ഗ്രസ്, കെ.എസ്.യു, യു.ഡി.എഫ് എന്നീവരുടെ നേതൃത്വത്തിലാണ് പ്രതിഷേധം. കോട്ടയത്ത് പൊലിസും പ്രവര്‍ത്തകരും തമ്മില്‍ സംഘര്‍മുണ്ടായി. സംഘര്‍ഷത്തില്‍ നിരവധി കോണ്‍ഗ്രസ് പ്രവര്‍ത്തകര്‍ക്ക് പരുക്കേറ്റു. പാലക്കാട് ദേശീയ പാത യൂത്ത് കോണ്‍ഗ്രസ് ഉപരോധിച്ചു. റോഡില്‍ ടയറുകള്‍ കത്തിച്ചു.

തിരുവനന്തപുരം സെക്രട്ടറിയേറ്റിന് മുമ്പിലും വന്‍ പ്രതിഷേധമുണ്ടായി. വയനാട്ടിലെ കല്‍പ്പറ്റയില്‍ പ്രതിഷേധ പ്രകടനത്തിന് ടി സിദ്ധിഖ് എം എല്‍ എ നേതൃത്വം നല്‍കി. എല്ലാ ജില്ലാ കേന്ദ്രങ്ങളിലും കോണ്‍ഗ്രസ് യു ഡി എഫ് പ്രവര്‍ത്തകര്‍ റാലികളും പ്രകടനങ്ങളും നടത്തുകയാണ്. പലയിടത്തും ദേശീയ പാത ഉപരോധിക്കുന്നുണ്ട്്.

തിരുവനന്തപുരം എറണാകുളം പാലക്കാട് കോഴിക്കോട് വയനാട് എന്നിവടങ്ങളില്‍ പ്രതിഷേധം അതിശക്തമാണ്. പലയിടത്തും പ്രവര്‍ത്തകര്‍ പിരിഞ്ഞുപോകാന്‍ കൂട്ടാക്കുന്നില്ല. രാത്രിയും പ്രതിഷേധം തുടരുകയാണ്.

ബഫര്‍ സോണ്‍ ഉത്തരവില്‍ ഇടപെടുന്നില്ലെന്ന വിചിത്രകാരണം പറഞ്ഞായിരുന്നു അതിക്രമം. എം.പിയുടെ ഓഫിസിന്റെ ഷട്ടറുകള്‍ക്ക് കേടുപാടുപറ്റി. ഓഫിസ് സ്റ്റാഫ് അഗസ്റ്റിന്‍ പുല്‍പ്പള്ളിയെ മര്‍ദ്ദിച്ചതായും കോണ്‍ഗ്രസ് ആരോപിച്ചു. അതേ സമയം നരേന്ദ്രമോദിയെ വിട്ട് കേവലം ഒരു എം.പിയായ രാഹുല്‍ ഗാന്ധിക്കെതിരെ തിരിയുന്നതിനു പിന്നില്‍ ബഫര്‍ സോണല്ലെന്നും ദുരൂഹതയുണ്ടെന്നും കെ.സി വേണുഗോപാല്‍ ആരോപിച്ചു.

വിഷയത്തില്‍ പിണറായി വിജയന്‍ മറുപടി പറയണമെന്നും വേണുഗോപാല്‍ ആവശ്യപ്പെട്ടു.അതേ സമയം ഓഫിസിലേക്ക് പ്രവര്‍ത്തകര്‍ തള്ളി കയറിയതോടെ പൊലിസ് ലാത്തിവീശി. നിരവധി എസ്.എഫ്.ഐ പ്രവര്‍ത്തകരെ പൊലിസ് അറസ്റ്റ് ചെയ്ത് നീക്കി. എസ്.എഫ്.ഐ പ്രവര്‍ത്തകരെ പറഞ്ഞയച്ചത് സി.പി.എം ആണെന്ന് ഡി.സി.സി പ്രസിഡന്റ് ആരോപിച്ചു. ആക്രമണത്തിന് പൊലിസ് ഒത്താശയുണ്ടെന്ന് കോണ്‍ഗ്രസ് ആരോപിച്ചു.