ന്യൂഡല്‍ഹി: ഗാസിയാബാദിലെ ലോനിയില്‍ മുസ്‌ലിം വൃദ്ധനെ ജയ്ശ്രീറാം വിളിക്കാനാവശ്യപ്പെട്ട് മര്‍ദിക്കുകയും താടിരോമങ്ങള്‍ മുറിച്ചുമാറ്റുകയും ചെയ്ത സംഭവത്തില്‍ ഇരട്ടത്താപ്പുമായി പൊലിസ്.
വൃദ്ധനെ തല്ലിച്ചതച്ചവര്‍ക്കെതിരേ കേസ് എടുക്കുന്നതിനു പകരം അത് വാര്‍ത്തയാക്കിയവര്‍ക്കെതിരേയും സംഭവത്തെക്കുറിച്ച് ട്വീറ്റ് ചെയ്തതിന് ട്വിറ്ററിനും കോണ്‍ഗ്രസ് നേതാക്കള്‍ക്കും മാധ്യമപ്രവര്‍ത്തകര്‍ക്കുമെതിരേയുമാണ് യു.പി പൊലിസ് കേസെടുത്തത്.

ഓണ്‍ലൈന്‍ മാധ്യമമായ ദി വയര്‍, മാധ്യമപ്രവര്‍ത്തകരായ റാണാ അയൂബ്, മുഹമ്മദ് സുബൈര്‍, സാബ നഖ്‌വി, കോണ്‍ഗ്രസ് നേതാക്കളായ ഡോ. ഷമ മുഹമ്മദ്, സല്‍മാന്‍ നിസാമി, മസ്‌കൂര്‍ ഉസ്മാനി തുടങ്ങി ഒന്‍പതു പേര്‍ക്കെതിരേയാണ് കലാപത്തിനു പ്രേരിപ്പിച്ച കുറ്റം ചുമത്തി കേസെടുത്തത്. തെറ്റിദ്ധാരണ പ്രചരിപ്പിക്കുന്നെന്നാരോപിച്ചാണ് കേസ്.
വിവിധ വിഭാഗങ്ങള്‍ക്കിടയില്‍ സ്പര്‍ധ വളര്‍ത്തല്‍, മതവികാരം വ്രണപ്പെടുത്തല്‍, ക്രിമിനല്‍ ഗൂഢാലോചന തുടങ്ങിയ വകുപ്പുകളും ചുമത്തി. ട്വീറ്റുകളിലൂടെ ഇവര്‍ ഹിന്ദു-മുസ്‌ലിം ശത്രുതയ്ക്ക് ശ്രമിച്ചെന്നും കുറ്റപ്പെടുത്തി. ട്വീറ്റുകള്‍ ക്രിമിനല്‍ ഗൂഢാലോചനയെക്കുറിച്ച് സൂചന നല്‍കുന്നതാണ്.

തെറ്റായ ട്വീറ്റുകള്‍ ആയിരങ്ങള്‍ റീട്വീറ്റ് ചെയ്തു. സത്യം മനസിലാക്കാതെ വ്യാജ വാര്‍ത്ത പ്രചരിപ്പിക്കാനാണ് ഇവര്‍ ശ്രമിച്ചതെന്നും പൊലിസ് പറഞ്ഞു.ഇക്കാര്യം പൊലിസ് വ്യക്തമാക്കിയിട്ടും ട്വീറ്റ് ചെയ്തവരോ ട്വിറ്ററോ ട്വീറ്റുകള്‍ നീക്കം ചെയ്തില്ല. ട്വിറ്റര്‍ നടപടി പുതിയ ഐ.ടി നിയമത്തിന്റെ ലംഘനമാണെന്നും പൊലിസ് എഫ്.ഐ.ആറില്‍ പറയുന്നു.
യു.പിയുമായി ബന്ധപ്പെട്ട് രാജ്യത്ത് വ്യാജവാര്‍ത്തകള്‍ പ്രചരിക്കുകയാണെന്നും അത് തടയാന്‍ ട്വിറ്റര്‍ നടപടി സ്വീകരിക്കുന്നില്ലെന്നും കേന്ദ്രമന്ത്രി രവിശങ്കര്‍ പ്രസാദ് കുറ്റപ്പെടുത്തി.