റിയോ ഡി ജനീറോ: മൈതാനത്ത് വീണ്ടും സാംബ നൃത്തം ചവിട്ടാ
നായി ബ്രസീല്‍പട നാളെ ഇറങ്ങുന്നു. വെനസ്വേലയെ 3-0ന് മുക്കി കോപാ അമേരിക്കയുടെ തുടക്കം ഗംഭീരമാക്കിയ ബ്രസീല്‍ ടൂര്‍ണമെന്റില്‍ ആധിപത്യമുറപ്പിക്കാനാണ് ഇറങ്ങുന്നത്. ടൂര്‍ണമെന്റിലെ ആദ്യ മത്സരത്തിനൊരുങ്ങുന്ന പെറുവാണ് എതിരാളികള്‍.

ആദ്യ മത്സരത്തില്‍ വെനസ്വേലയെ കീഴടക്കിയ ബ്രസീല്‍ ഇന്നും അതേ രീതി തുടരുമെന്ന ആത്മവിശ്വാസത്തിലാണ്. നെയ്മര്‍ നയിക്കുന്ന ആക്രമണ നിരയെയാണ് പെറു ഭയക്കുന്നത്. അവസാനമായി കണ്ടുമുട്ടിയ ലോകകപ്പ് യോഗ്യതാ മത്സരത്തില്‍ പെറുവിന് ഇക്കാര്യം നന്നായി ബോധ്യപ്പെട്ടതാണ്. അന്ന് 4-2ന് ബ്രസീല്‍ പെറുവിനെ തകര്‍ത്തുവിട്ടപ്പോള്‍ മൂന്നു ഗോളും നെയ്മറിന്റെ വകയായിരുന്നു. ഇക്കഴിഞ്ഞ വെനസ്വേലക്കെതിരായ മത്സരത്തിലും പി.എസ്.ജി താരം നിര്‍ണായക പങ്കുവഹിച്ചു. ഒരു ഗോള്‍ സ്വന്തമാക്കിയപ്പോള്‍ ഗോളിനുള്ള വഴികാട്ടിയാകാനും നെയ്മറിന് കഴിഞ്ഞു. എന്നാല്‍ പെറുവാകട്ടെ, ഇക്വഡോറിനെ 2-1ന് പരാജയപ്പെടുത്തിയാണ് വരവ്. പരാജയവും സമനിലയും നിറഞ്ഞ എട്ട് മത്സരങ്ങള്‍ക്ക് ശേഷമാണ് ഇക്വഡോറിനെതിരായ ലോകകപ്പ് യോഗ്യതയില്‍ ടീം വിജയിച്ചത്. ആറെണ്ണം പരാജയപ്പെട്ടപ്പോള്‍ രണ്ടെണ്ണം സമനില നേടി ആശ്വസിച്ചു.
അവസാന മത്സരത്തില്‍ ജയിച്ചതിന്റെ ആത്മവിശ്വാസത്തിലാണ് പെറു ഇന്നിറങ്ങുന്നത്. ഇന്നത്തെ മത്സരത്തില്‍ വിജയിച്ചാല്‍ ബ്രസീലിന് ക്വാര്‍ട്ടറിലേക്കുള്ള സ്ഥാനം ഉറപ്പിക്കാം. വെനസ്വേലയ്‌ക്കെതിരേ കരുത്ത് തെളിയിച്ച അതേ ടീമിനെ തന്നെയാലും പരിശീലകന്‍ ടിറ്റെ കളത്തിലിക്കുക. ചാംപ്യന്‍സ് ലീഗ് ഫൈനലിനിടെ പരുക്കേറ്റ ചെല്‍സി താരം തിയാഗോ സില്‍വയുടെ സ്ഥാനം ഇന്നും പുറത്തായിരിക്കും. ബ്രസീല്‍ ആദ്യ മത്സരത്തിലെ അതേ ഫോര്‍മേഷനില്‍ തുടരാനാണ് സാധ്യത. അതേസമയം, ബ്രസീലിന്റെ മുന്നേറ്റത്തിന് തടയിടാന്‍ വേണ്ടി പ്രതിരോധം ശക്തമാക്കി 4-2-3-1 ശൈലിയിലാവും പെറു താരങ്ങള്‍ അണിനിരക്കുക.