ചണ്ഡിഗഢ്: പഞ്ചാബ് മുഖ്യമന്ത്രിയും ആം ആദ്മി നേതാവുമായ ഭഗവന്ത് മന്‍ ഇന്ന് വിവാഹിതനാകുന്നു. ചണ്ഡിഗഢിലെ വസതിയില്‍ ലളിതമായ ചടങ്ങുകളോടെയാണ് വിവാഹം. പഞ്ചാബ് സ്വദേശിയായ ഡോ. ഗുര്‍പ്രീത് കൗറാണ് ആണ് വധു.

ബന്ധുക്കളും അടുത്ത സുഹൃത്തുക്കളും മാത്രമാകും ചടങ്ങില്‍ പങ്കെടുക്കുക. ഡല്‍ഹി മുഖ്യമന്ത്രിയും ആം ആദ്മി നേതാവുമായ അരവിന്ദ് കെജ്‌രിവാള്‍ ചടങ്ങില്‍ പങ്കെടുക്കുമെന്നാണ് വിവരം.

കുരുക്ഷേത്ര ജില്ലയിലെ പെഹോവയിലെ കര്ഷക കുടുംബത്തിലാണ് 32കാരിയായ ഗുരുപ്രീത് കൗര്‍. പിതാവ് ഇന്ദ്രജിത് സിങ് മാതാവ് മാത രാജ് കൗര്‍.

48കാരനായ ഭഗവന്ത് മനിന്റെ രണ്ടാം വിവാഹമാണിത്. 6 വര്‍ഷങ്ങള്‍ക്ക് മുമ്പാണ് ആദ്യ ഭാര്യ ഇന്ദര്‍പ്രീത് കൗറുമായുള്ള വിവാഹ ബന്ധം വേര്‍പ്പെടുത്തിയത്. ഈ ബന്ധത്തില്‍ രണ്ട് മക്കളാണുള്ളത്. ആദ്യ ഭാര്യയും മക്കളും ഇപ്പോള്‍ അമേരിക്കയിലാണ് താമസം. ഭഗവന്ത് മന്‍ പഞ്ചാബ് മുഖ്യമന്ത്രിയായി സത്യപ്രതിജ് ചെയ്ത് അധികാരമേറ്റ ചടങ്ങില്‍ പങ്കെടുക്കാനായി ഇരുവരും അമേരിക്കയില്‍ നിന്നും എത്തിയിരുന്നു.

രാഷ്ട്രീയ പ്രവേശനത്തിന് മുമ്പ് നടനായും സ്റ്റാന്‍ഡ് അപ്പ് കൊമേഡിയനായും തിളങ്ങിയ ആളാണ് ഭഗവന്ത് മന്‍. 2014 മുതല്‍ സഗ്രൂരില്‍ നിന്നുള്ള ലോക്‌സഭാംഗമായിരുന്നു. 2014ലാണ് ഭഗവന്ത് മന്‍ ആം ആദ്മി പാര്‍ട്ടിയില്‍ ചേരുന്നത്.