വെള്ളിമാട്കുന്ന് ബാലമന്ദിരത്തില്‍ നിന്ന് കാണാതായ കുട്ടികളെ കണ്ടെത്തി

കോഴിക്കോട്: കോഴിക്കോട് വെള്ളിമാടുകുന്ന് ബാലമന്ദിരത്തില്‍ നിന്ന് കാണാതായ നാലു കുട്ടികളേയും കണ്ടെത്തി. ഏറനാട് എക്‌സ്പ്രസില്‍ സഞ്ചരിച്ചിരുന്ന മൂന്നുപേരെ ഷൊര്‍ണൂരില്‍ നിന്നാണ് കണ്ടെത്തിയത്. ഉത്തര്‍പ്രദേശ് സ്വദേശിയായ കുട്ടിയെ കോഴിക്കോട് റെയില്‍വേ സ്‌റ്റേഷനില്‍ നിന്നാണ് കണ്ടെത്തിയത്.

ഏറനാട് എക്‌സ്പ്രസ് ട്രെയിനില്‍ യാത്ര ചെയ്യുമ്പോഴാണ് ഷൊര്‍ണൂര്‍ റെയില്‍വേ സ്റ്റേഷനില്‍ വച്ച് മലയാളികളായ മൂന്നു കുട്ടികളെ കണ്ടെത്തിയത്.

ഇന്നു പുലര്‍ച്ചെയാണ് ബോയ്‌സ് ഹോമില്‍നിന്ന് 16 വയസ്സുള്ള രണ്ടു കുട്ടികളും 15 വയസ്സുള്ള രണ്ടു കുട്ടികളും ചാടിപ്പോയത്. സംസ്ഥാനത്തെ എല്ലാ പൊലീസ് സ്റ്റേഷനുകള്‍ക്കും ആര്‍പിഎഫിനും കുട്ടികളുടെ വിവരം കൈമാറി അന്വേഷണം തുടരുന്നതിനിടെയാണ് നാലു പേരെയും കണ്ടെത്തിയത്.