ഗസ്സ: ഫലസ്തീനിലെ ഗസ്സയെ ലക്ഷ്യംവച്ച് വീണ്ടും ഇസ്‌റാഈല്‍ വ്യോമാക്രമണം. ഗസ്സ സ്ട്രിപ്പിലെ ആയുധനിര്‍മാണ കേന്ദ്രത്തെയാണ് ലക്ഷ്യംവച്ചതെന്നാണ് ഇസ്‌റാഈലിന്റെ വിശദീകരണം. സംഭവത്തില്‍ ആളപായം റിപ്പോര്‍ട്ട് ചെയ്തിട്ടില്ല.

ഗസ്സയില്‍ നിരന്തരമായുണ്ടായ ആക്രമണ, പ്രത്യാക്രമണങ്ങള്‍ക്കു പിന്നാലെ കഴിഞ്ഞ മെയ് മാസത്തില്‍ ഇരുവിഭാഗവും വെടിനിര്‍ത്തല്‍ പ്രഖ്യാപിച്ചിരുന്നു. ഈ സമാധാന കരാര്‍ ലംഘിച്ച് ഇതു മൂന്നാം തവണയാണ് ഇസ്‌റാഈല്‍ ഗസ്സയില്‍ വ്യോമാക്രമണം നടത്തുന്നത്.
ഇന്നലെ നടന്ന വ്യോമാക്രമണത്തില്‍ പരിശീലന കേന്ദ്രത്തില്‍ കേടുപാടുകളുണ്ടായതായി ഹമാസും പ്രതികരിച്ചിട്ടുണ്ട്. ഹമാസിന്റെ ഭാഗത്തുനിന്ന് ആക്രമണ ശ്രമം ഉണ്ടായതിനു പിന്നാലെയാണ് വ്യോമാക്രമണം നടത്തിയതെന്നാണ് ഇസ്‌റാഈല്‍ അവകാശപ്പെടുന്നത്. എന്നാല്‍, ഇക്കാര്യത്തില്‍ ഹമാസ് പ്രതികരിച്ചിട്ടില്ല. മെയ് മാസത്തില്‍ ഗസ്സയില്‍ നടന്ന നിരന്തര ആക്രമണങ്ങളില്‍ 66 കുട്ടികളുള്‍പ്പെടെ 256 ഫലസ്തീനുകാര്‍ കൊല്ലപ്പെട്ടിരുന്നു. ഇസ്‌റാഈലില്‍ രണ്ടു കുട്ടികളുള്‍പ്പെടെ 13 പേരും കൊല്ലപ്പെട്ടതിനു പിന്നാലെയായിരുന്നു വെടിനിര്‍ത്തല്‍ പ്രഖ്യാപിച്ചിരുന്നത്.