ഏഷ്യയുടെ ക്രിക്കറ്റ് മാമാങ്കത്തിന് ഇന്ന് കൊടിയേറ്റം; ഇന്ത്യയുടെ ആദ്യ മത്സരം പാകിസ്താനെതിരെ

ഏഷ്യയുടെ ക്രിക്കറ്റ് മാമാങ്കത്തിന് ഇന്ന് കൊടിയേറും. പാകിസ്ഥാനിലെ മുള്‍ത്താന്‍ ക്രിക്കറ്റ് സ്റ്റേഡിയത്തില്‍ വെച്ച് പാകിസ്ഥാനും നേപ്പാളും തമ്മിലുള്ള ആദ്യ മത്സരത്തോടെയാണ് ഈ വര്‍ഷത്തെ ഏഷ്യാ കപ്പിന് തുടക്കം കുറിക്കുന്നത്. ഏകദിന ലോകകപ്പ് പടിവാതില്‍ക്കല്‍ എത്തി നില്‍ക്കെ കരുത്ത് തെളിയിക്കാനുള്ള അവസരം കൂടിയാണ് ഇന്ത്യക്ക് ഇത്തവണത്തെ ടൂര്‍ണമെന്റ്.

ആറ് രാജ്യങ്ങള്‍ മാറ്റുരക്കുന്ന ടൂര്‍ണമെന്റിന് പാകിസ്ഥാനും ശ്രീലങ്കയുമാണ് ആതിഥേയത്വം വഹിക്കുന്നത്. സെപ്റ്റംബര്‍ 17 ന് ശ്രീലങ്കയിലെ കൊളംബോയില്‍ വെച്ചാണ് ഫൈനല്‍ മത്സരം.
ശനിയാഴ്ച്ച ശ്രീലങ്കയിലെ പല്ലെകെലെയില്‍ വെച്ച് നടക്കുന്ന ഇന്ത്യയുടെ ആദ്യ മത്സരത്തില്‍ പാകിസ്ഥാനാണ് എതിരാളികള്‍.

കഴിഞ്ഞ തവണ ട്വന്റി 20 ഫോര്‍മാറ്റില്‍ നടത്തിയ ഏഷ്യാ കപ്പ് ടൂര്‍ണമെന്റില്‍ വിജയിക്കാനായതിന്റെ ആത്മവിശ്വാസത്തിലാണ് ശ്രീലങ്ക ഇത്തവണ പോരിനിറങ്ങുന്നത്. അതേസമയം ഏകദിന റാങ്കിങ്ങില്‍ ഒന്നാം സ്ഥാനം പിടിച്ചടക്കിയ പാക് പടയും പൊരുതാനുറച്ചാണ് കളത്തിലിറങ്ങുന്നത്. അതേസമയം ഏഷ്യ കപ്പ് ചരിത്രത്തില്‍ ഏറ്റവും കൂടുതല്‍ ട്രോഫികള്‍ സ്വന്തം പാളയത്തിലെത്തിച്ചതിന്റെ ആത്മവിശ്വാസമാണ് ഇന്ത്യയുടെ മുതല്‍ക്കൂട്ട്. ശനിയാഴ്ച്ച വൈകീട്ട് 3 മണിക്കാണ് ഇന്ത്യയും പാകിസ്ഥാനും തമ്മിലുള്ള ആദ്യ മത്സരം തുടങ്ങുന്നത്.

ഇന്ത്യയെ സംബന്ധിച്ച് പരിക്കിന്റെ പിടിയിലായിരുന്ന ശ്രേയസ് അയ്യരും ജസ്പ്രീത് ബുംറയും തിരിച്ചെത്തിയത് ടീമിന് മുതല്‍ക്കൂട്ടാണ്. 17 അംഗ ടീമില്‍ റിസര്‍വ്വ് ബെഞ്ചില്‍ മലയാളി താരം സഞ്ജു സാംസണും ഇടം പിടിച്ചിട്ടുണ്ട്. പരിക്ക് മാറി ടീമില്‍ തിരിച്ചെത്തിയ കെ.എല്‍ രാഹുല്‍ ആദ്യ രണ്ട് മത്സരങ്ങളില്‍ ടീമിനായി പാഡണിയില്ലെന്നാണ് റിപ്പോര്‍ട്ട്. ഏഷ്യാ കപ്പിന് ശേഷം ആസ്‌ട്രേലിയയുമായി മൂന്ന് ഏകദിനങ്ങളടങ്ങുന്ന പരമ്പരയും ഇന്ത്യ കളിക്കുന്നുണ്ട്.