ഗസ്സ സിറ്റി: ബശ്ശാറുല്‍ അസദ് ഭരണകൂടത്തെ അട്ടിമറിച്ചു വിമതര്‍ അധികാരം പിടിച്ചതിന് പിന്നാലെ സിറിയന്‍ ജനതയെ അഭിനന്ദിച്ച് വിവിധ പോരാട്ട സംഘങ്ങളാണ് രംഗത്തെത്തിയത്. ഫലസ്തീന് പ്രതിരോധ സംഘമായ ഹമാസും തങ്ങളുടെ അഭിനന്ദനങ്ങള്‍ സിറിയന്‍ ജനതയെ അറിയിച്ചു. 

സ്വാതന്ത്ര്യത്തിനും നീതിക്കും വേണ്ടിയുള്ള അഭിലാഷങ്ങള്‍ കൈവരിക്കാനായതില്‍ സിറിയന്‍ ജനതയ്ക്ക് അഭിനന്ദനം- ഹമാസ് വാര്‍ത്താകുറിപ്പിലൂടെ പ്രതികരിച്ചു. സിറിയന്‍ ജനതക്കൊപ്പം ശക്തമായി നിലകൊള്ളുന്നു. സിറിയക്കാരുടെ രാഷ്ട്രീയ തെരഞ്ഞെടുപ്പുകളെയും സ്വാതന്ത്ര്യത്തേയും ഇഷ്ടങ്ങളെയും മാനിക്കുന്നു. വാര്‍ത്താകുറിപ്പില്‍ ഹമാസ് വ്യക്തമാക്കി.

ഒന്നിച്ചു നില്‍ക്കുക. ഭൂതകാലത്തിന്റെ മുറിവുകളില്‍ നിന്ന് ഉയിര്‍ത്തെഴുന്നേല്‍ക്കുക- ഹമാസ് സിറിയന്‍ ജനതയോട് ആഹ്വാനം ചെയ്തു. ബശ്ശാര്‍ അല്‍ അസദിനെതിരായ പോരാട്ടത്തെ ഹമാസ് തുടക്കം മുതലേ പിന്തുണച്ചിരുന്ന ഹമാസ് സിറിയയിലെ വിമത നീക്കത്തില്‍ ഇതാദ്യമായാണ് പ്രതികരിക്കുന്നത്. 

മറ്റൊരു ഫലസ്തീന്‍ സംഘടനയായ ഇസ്‌ലാമിക് ജിഹാദും പ്രതികരിച്ചിട്ടുണ്ട്. ഫലസ്തീന്‍ ജനതയ്ക്കും അവരുടെ ന്യായമായ വിഷയങ്ങള്‍ക്കും സിറിയ എന്നും നല്‍കിവരുന്ന പിന്തുണ തുടരുമെന്നാണു പ്രതീക്ഷയെന്ന് ഇസ്‌ലാമിക് ജിഹാദ് പറഞ്ഞു.

2000 മുതല്‍ ഹമാസ് നേതാക്കളില്‍ പലരും കഴിഞ്ഞിരുന്നത് സിറിയയില്‍ അസദ് ഭരണകൂടത്തിന്റെ സംരക്ഷണത്തിലായിരുന്നു. എന്നാല്‍, 2011ലെ ജനകീയ പ്രക്ഷോഭത്തില്‍ നിഷ്പക്ഷ നിലപാടെടുത്തത് സിറിയന്‍ ഭരണകൂടത്തെ ചൊടിപ്പിച്ചു. അസദ് സര്‍ക്കാരിനെ പരസ്യമായി പിന്തുണയ്ക്കണമെന്ന ആവശ്യം ഹമാസ് നേതാക്കള്‍ നിരസിക്കുകയും രാജ്യം വിടുകയുമായിരുന്നു. പിന്നാലെ ജനകീയ പ്രക്ഷോഭത്തിനു പരസ്യ പിന്തുണ പ്രഖ്യാപിക്കുകയും ചെയ്തു.

2022ല്‍ അസദ് ഭരണകൂടവുമായി ഹമാസ് ബന്ധം പുനഃസ്ഥാപിച്ചു. ഹമാസ് നേതാക്കള്‍ സിറിയന്‍ തലസ്ഥാനമായ ദമാസ്‌കസിലെത്തി ബശ്ശാറുല്‍ അസദുമായി കൂടിക്കാഴ്ച നടത്തുകയും ചെയ്തു.

 2023ല്‍ സിറിയന്‍ ഭരണകൂടം സംഘടനയ്‌ക്കെതിരെ വഞ്ചനാ ആരോപണങ്ങള്‍ ഉയര്‍ത്തിയതോടെ ബന്ധം വീണ്ടും ഉലഞ്ഞിരുന്നു. അതേസമയം, സിറിയയും ഇറാനും ലെബനനിലെ ഹിസ്ബുള്ള പ്രസ്ഥാനവും ഫലസ്തീനിയന്‍ ഗ്രൂപ്പുകളും ചേര്‍ന്ന് ഇസ്‌റാഈലിനെ എതിര്‍ക്കാന്‍ 'പ്രതിരോധത്തിന്റെ അച്ചുതണ്ട്' രൂപീകരിച്ചിരുന്നു.