ജയ്പൂര്‍: പാര്‍ട്ടി വിരുദ്ധ, ഇസ്‌ലാമോഫോബിക് വേദിയുടെ മേധാവിയെ രാജസ്ഥാനില്‍ സ്ഥാനാര്‍ഥിയാക്കിയതില്‍ കോണ്‍ഗ്രസ് നേതാക്കള്‍ക്ക് തന്നെ ഞെട്ടല്‍. കോണ്‍ഗ്രസിനും മുസ്ലിംകള്‍ക്കും പ്രഥിപക്ഷനേതാക്കള്‍ക്കും എതിരേ നിരന്തരം നിലകൊണ്ട വലതുപക്ഷ ആശയപ്രചാരം നടത്തുന്ന 'ജയ്പൂര്‍ ഡയലോഗ്‌സ്' ഡയറക്ടര്‍ സുനില്‍ ശര്‍മയെ തലസ്ഥാനനഗരി ഉള്‍പ്പെടുന്ന ജയ്പൂര്‍ ലോക്‌സഭാ മണ്ഡലത്തില്‍നിന്ന് തന്നെയാണ് മത്സരിപ്പിക്കുന്നത്. ഇന്നലെ പുറത്തിറങ്ങിയ പട്ടികയിലാണ് സുനില്‍ ശര്‍മയുടെ പേരും ഉള്‍പ്പെട്ടത്. ജയ്പൂരില്‍ ഇതുവരെ ബി.ജെ.പിസ്ഥാനാര്‍ഥിയെ പ്രഖ്യാപിച്ചിട്ടില്ല.

സംഘ്പരിവാര്‍ പ്രോപ്പഗണ്ടകള്‍ ഏറ്റുപിടിച്ചും അതിന് സ്ഥാനം നല്‍കിയും ശ്രദ്ധിക്കപ്പെട്ട ജയ്പൂര്‍ ഡയലോഗ്‌സ്, തീവ്ര ഇസ്ലാം വിരുദ്ധ ഉള്ളടക്കങ്ങളും ന്യൂനപക്ഷവിരുദ്ധതയും പ്രചരിപ്പിക്കുന്ന ഹിന്ദുത്വ വേദിയാണ്. സുനില്‍ ശര്‍മയുടെ സ്ഥാനാര്‍ഥി പ്രഖ്യാപനം വാര്‍ത്തയായതോടെ വിമര്‍ശനവമുായി നിരവധി പേര്‍ രംഗത്തുവന്നു. മുതിര്‍ന്ന നേതാവും മുന്‍ കേന്ദ്രമന്ത്രിയുമായ ഡോ. ശശി തരൂരും തന്റെ വിയോജിപ്പ് പരസ്യപ്പെടുത്തി.

ജയ്പൂര്‍ ഡയലോഗ്‌സിന്റെ സമൂഹമാധ്യമ അക്കൗണ്ടുകളില്‍നിന്ന് വന്ന കോണ്‍ഗ്രസ്, ന്യൂനപക്ഷവിരുദ്ധ സന്ദേശങ്ങളുടെ ഉള്ളടക്കങ്ങള്‍ പങ്കുവച്ച്, ഇതാണ് നിങ്ങള്‍ ജയ്പൂരില്‍ നിര്‍ത്തിയ സ്ഥാനാര്‍ഥിയെന്ന് കോണ്‍ഗ്രസ് നേതാക്കളായ മല്ലികാര്‍ജുന്‍ ഖാര്‍ഗെ, രാഹുല്‍ ഗാന്ധി, പ്രിയങ്ക ഗാന്ധി എന്നിവരെ ടാഗ് ചെയ്ത് ആള്‍ട്ട് ന്യൂസ് സഹസ്ഥാപകന്‍ മുഹമ്മദ് സുബൈര്‍ ട്വീറ്റ്‌ചെയ്തു. സുനില്‍ ശര്‍മയെ കുറിച്ചുള്ള സുബൈറിന്റെ ട്വീറ്റ് പങ്കുവച്ചാണ് തരൂര്‍ തന്റെ ഞെട്ടല്‍ അറിയിച്ചത്.

ശര്‍മയെ സ്ഥാനാര്‍ഥിയായി പ്രഖ്യാപിച്ചതിന് പിന്നാലെ ജയ്പൂര്‍ ഡയലോഗ്‌സുമായുള്ള അദ്ദേഹത്തിന്റെ ബന്ധത്തെക്കുറിച്ചുള്ള മാധ്യമപ്രവര്‍ത്തകന്റെ ചോദ്യത്തില്‍ അദ്ദേഹം പ്രകോപിതനാകുകയുംചെയ്തു. ഇതിന്റെ വിഡിയോ സമൂഹമാധ്യമങ്ങളില്‍ വൈറലാണ്. ആവര്‍ത്തിച്ചുള്ള ചോദ്യത്തില്‍ നിന്ന് ഒഴിഞ്ഞുമാറിയ അദ്ദേഹം, പ്രകോപിതനായി തന്റെ കഴുത്തിലെ മാലകള്‍ നീക്കം ചെയ്യുന്നത് വീഡിയോയില്‍ കാണാം.

Congress awards LS ticket to Sunil Sharma of islamophobic Jaipur Dialogues