മുല്ല ബറാദര്‍ ഉപപ്രധാനമന്ത്രി, ഹഖാനിക്ക് ആഭ്യന്തരം, യഅ്ഖൂബിന് പ്രതിരോധം
മന്ത്രിസഭയില്‍ സ്ത്രീകളില്ല
കാബൂള്‍: അഫ്ഗാനിലെ പുതിയ ഇടക്കാല സര്‍ക്കാരിനെ പ്രഖ്യാപിച്ച് താലിബാന്‍ നേതൃത്വം. റഹ്ബാരി ശൂറ തലവന്‍ മുഹമ്മദ് ഹസന്‍ അഖുന്‍ദാണ് പ്രധാനമന്ത്രി. അബ്ദുല്‍ഗനി ബറാദര്‍ ഉപപ്രധാനമന്ത്രിയായിരിക്കും.
കടുത്ത നിലപാടുകാരനായ സിറാജുദ്ദീന്‍ ഹഖാനിയാണ് ആഭ്യന്തരമന്ത്രി. താലിബാന്‍ സ്ഥാപകന്‍ മുല്ല ഉമറിന്റെ മകനും സൈനിക മേധാവിയുമായ മുല്ല മുഹമ്മദ് യഅ്ഖൂബിനാണ് പ്രതിരോധം. താലിബാന്റെ പ്രധാന വക്താവ് സബീഹുല്ല മുജാഹിദാണ് വാര്‍ത്താസമ്മേളനത്തില്‍ സര്‍ക്കാര്‍ രൂപീകരിച്ച വിവരം അറിയിച്ചത്.
ഹിദായത്തുല്ല ബദ്‌രിയാണ് ധനമന്ത്രി. മന്ത്രിസഭയില്‍ കൂടുതലും പഷ്തൂണ്‍ വിഭാഗക്കാരാണ്. എന്നാല്‍ താജിക്-ഉസ്‌ബെക് ഗോത്രവര്‍ഗ ന്യൂനപക്ഷങ്ങള്‍ക്ക് പരിഗണന ലഭിച്ചില്ല.
ഇപ്പോള്‍ പ്രഖ്യാപിച്ചത് താല്‍ക്കാലിക സര്‍ക്കാരിനെയാണെന്നും രാജ്യത്തിന്റെ മറ്റു ഭാഗത്തുള്ളവരെയും മന്ത്രിസഭയിലുള്‍പ്പെടുത്തുമെന്നും സബീഹുല്ല അറിയിച്ചു. മുഹമ്മദ് ഹസന്‍ അഖുന്‍ദ് ആദ്യ താലിബാന്‍ സര്‍ക്കാരില്‍ വിദേശകാര്യമന്ത്രിയായിരുന്നു.
മന്ത്രിസഭയിലെ പലരും മുന്‍ താലിബാന്‍ മന്ത്രിസഭയില്‍ അംഗങ്ങളായിരുന്നു. അമീര്‍ഖാന്‍ മുത്തഖിയാണ് വിദേശകാര്യ മന്ത്രി. ശൈഖ് മൗലവി നൂറുല്ല (വിദ്യാഭ്യാസം), മുല്ല ഖൈറുല്ല ഖൈറുല്ല (വാര്‍ത്താവിനിമയം-സാംസ്‌കാരികം), അബ്ദുല്‍ ഹകീം ശരീഇ (നീതിന്യായം), നൂറുല്ല നൂരി (അതിര്‍ത്തി), മുല്ല മുഹമ്മദ് ഈസ അഖുന്‍ദ് (ഖനനം-പെട്രോളിയം), മുല്ല മുഹമ്മദ് യൂനുസ് അഖുന്‍സാദ (വികസനം) തുടങ്ങിയവരാണ് മറ്റു മന്ത്രിമാര്‍.
അബ്ദുല്‍ ഹഖ് വാസിഖാണ് ഇന്റലിജന്‍സ് ഡയരക്ടര്‍. സെന്‍ട്രല്‍ ബാങ്ക് ഡയരക്ടര്‍ ഹാജി മുഹമ്മദ് ഇദ്‌രീസിനെയും തിരഞ്ഞെടുത്തു. പാര്‍ട്ടി വക്താവായ സബീഹുല്ല മുജാഹിദ് വാര്‍ത്താവിനിമയ-സാംസ്‌കാരിക വകുപ്പ് ഉപമന്ത്രിയാണ്.