തിരുവനന്തപുരം: നിയമസഭാ കയ്യാങ്കളിയുമായി ബന്ധപ്പെട്ട് പ്രചരിച്ച ദൃശ്യങ്ങള്‍ യഥാര്‍ത്ഥമല്ലെന്ന വിചിത്ര വാദവുമായി കേസിലെ പ്രതികള്‍ കോടതിയില്‍. കേസില്‍ നിന്നും തങ്ങളെ ഒഴിവാക്കണമെന്ന് ആവശ്യപ്പെട്ടുള്ള വിടുതല്‍ ഹരജിയില്‍ സി.ജെ.എം കോടതിയില്‍ വാദം കേള്‍ക്കുന്നതിനിടെയാണ് പുതിയ ന്യായങ്ങളുമായി പ്രതികളെത്തിയത്. മന്ത്രി വി. ശിവന്‍കുട്ടി, ഇ .പി ജയരാജന്‍, കെ .ടി ജലീല്‍, കെ. അജിത്ത്, സി. കെ സദാശിവന്‍, കുഞ്ഞഹമ്മദ് മാസ്റ്റര്‍ എന്നിവരാണ് വിടുതല്‍ ഹരജി സമര്‍പ്പിച്ചത്. സ്പീക്കറുടെ ഡയസില്‍ കയറിയത് തങ്ങള്‍ ആറ് എം.എല്‍.എമാര്‍ മാത്രമല്ലെന്നും തോമസ് ഐസക്കും സുനില്‍കുമാറും ബി .സത്യനും ഒപ്പമുണ്ടായിരുന്നുവെന്നും ഹരജിയില്‍ പറയുന്നു.

സംഘര്‍ഷമുണ്ടാക്കിയത് വാച്ച് ആന്റ് വാര്‍ഡായി എത്തിയ പൊലിസുകാരാണ്. പ്രചരിപ്പിക്കപ്പെട്ട ദൃശ്യങ്ങള്‍ യഥാര്‍ത്ഥമല്ല. അക്രമം നടത്താന്‍ പ്രതികള്‍ക്ക് ഉദ്ദേശച്ചിരുന്നില്ല. ബലം പ്രയോഗിച്ച പൊലിസിനെ പ്രതിരോധിക്കുക മാത്രമാണ് ചെയ്തത്. കേസില്‍ പൊലിസ് മാത്രമാണ് സാക്ഷികള്‍. 140 എം.എല്‍.എമാരെയും 21 മന്ത്രിമാരെയും സാക്ഷിയാക്കിയില്ലെന്നും പ്രതികള്‍ വാദിച്ചു. പ്രതികളുടെ വിടുതല്‍ ഹരജിയെ എതിര്‍ത്ത സര്‍ക്കാര്‍ അഭിഭാഷകന്‍ പ്രതികള്‍ പ്രഥമ ദൃഷ്ടാ കുറ്റം ചെയ്തതായി കോടതിയെ അറിയിച്ചു. നിയമപരമായ കുറ്റകൃത്യമെന്ന് അറിഞ്ഞു കൊണ്ടായിരുന്നു അക്രമം. പ്രതികളുടെ പ്രവൃത്തി നിയമസഭാ ചരിത്രത്തില്‍ ആദ്യമെന്നും സര്‍ക്കാര്‍ അഭിഭാഷകന്‍ വാദിച്ചു. ഹരജിയില്‍ അടുത്തമാസം ഏഴിന് കോടതി വിധി പറയും