മുംബൈ: അജിത് പവാര്‍ തിരിച്ചുവരാന്‍ തീരുമാനിച്ചാല്‍ അദ്ദേഹത്തെ സ്വീകരിക്കണമോ എന്ന് പാര്‍ട്ടി സഹപ്രവര്‍ത്തകര്‍ തീരുമാനിക്കുമെന്ന് എന്‍.സി.പി. സ്ഥാപകന്‍ ശരദ് പവാര്‍. പവാര്‍ കുടുംബത്തില്‍ അജിത്തിന് എന്നു സ്ഥാനമുണ്ട്. എന്നാല്‍, പാര്‍ട്ടിക്കുള്ളിലെ തീരുമാനങ്ങള്‍ എടുക്കേണ്ടത് താനല്ലെന്നും പ്രതിസന്ധി ഘട്ടത്തില്‍ ഒപ്പം നിന്നവരുടെ അഭിപ്രായം തേടേണ്ടതുണ്ടെന്നും അദ്ദേഹം പറഞ്ഞു. 

ലോക്സഭാ തെരഞ്ഞെടുപ്പിലെ മോശം പ്രകടനമാണ് അജിത് പവാറിന്റെ എന്‍.സി.പി വിട്ട് നേതാക്കളെ ശരദ് പവാര്‍ നേതൃത്വം നല്‍കുന്ന എന്‍.സി.പിയിലേക്ക് തിരിച്ചുവരാനുള്ള സാഹചര്യമൊരുക്കിയത്. ബുധനാഴ്ച പാര്‍ട്ടിയിലെ നാല് മുതിര്‍ന്ന നേതാക്കള്‍ രാജിവെച്ചിരുന്നു. ഇവര്‍ വരുംദിവസങ്ങളില്‍ ശരദ് പവാറിന്റെ പാര്‍ട്ടിയില്‍ ചേര്‍ന്നേക്കുമെന്നാണ് റിപ്പോര്‍ട്ടുകള്‍.

2023-ല്‍ അജിത് പവാറിന്റെ നീക്കമാണ്  എന്‍.സി.പിയുടെ പിളര്‍പ്പിന് വഴിവെച്ചത്. അജിത് പവാര്‍ നേതൃത്വം നല്‍കുന്ന എന്‍.സി.പി, ഏക്നാഥ് ഷിന്‍ഡെ സര്‍ക്കാരിന്റെ ഭാഗമാവുകയുമായിരുന്നു. ലോക്സഭാ തെരഞ്ഞെടുപ്പില്‍ എന്‍.ഡി.എയുടെ ഭാഗമായി 4 സീറ്റില്‍ മത്സരിച്ചുവെങ്കിലും ഒരേയൊരു സീറ്റില്‍ മാത്രമായിരുന്നു അജിത് പവാറിന്റെ പാര്‍ട്ടിക്ക് വിജയിക്കാന്‍ കഴിഞ്ഞത്. 

അതേസമയം, ശരദ് പവാര്‍ പക്ഷം മത്സരിച്ച 10 സീറ്റുകളില്‍ എട്ടെണ്ണത്തിലും വിജയിച്ച് മിന്നുന്ന പ്രകടനമാണ് കാഴ്ച്ചവെച്ചത്.