കൊച്ചി: കേരളാ പൊലിസാണോ ഗള്‍ഫ് പൊലിസാണോ മികച്ചത് എന്ന് പരിശോധിക്കാനിറങ്ങിയ 22കാരന് കിട്ടിയത് എട്ടിന്റെ പണി. മൊഗ്രാല്‍ കൊപ്പളത്തെ എ.എം മൂസഫഹദ് പിന്നെ ഒന്നും നോക്കിയില്ല, മൊഗ്രാലിലുള്ള സൗത്ത് ഇന്ത്യന്‍ ബാങ്കിന്റെ എടിഎം തന്നെ കുത്തിത്തുറന്ന് മോഷണം നടത്താനുള്ള ശ്രമമരംഭിക്കുകയായിരുന്നു. ജൂലൈ 31നാണ് സംഭവം.

മോഷണം നടത്തുന്നതിനിടെ പൊലിസ് വാഹനത്തിന്റെ ശബ്ദം കേട്ട മൂസഫഹദ് ശ്രമം ഉപേക്ഷിച്ച് രക്ഷപ്പെട്ടോടി. എന്നാല്‍ സിസിടിവി ദൃശ്യങ്ങളില്‍ കൃത്യമായി പതിഞ്ഞ മൂസഫഹദിന്റെ മുഖം പെലിസിന്റെ നിരീക്ഷണത്തിലായി. തുടര്‍ന്ന് ഞായറാഴ്ച വൈകിട്ടോടെ പ്രതിയെ പിടികൂടുകയും അറസ്റ്റ് ചെയ്യുകയും ചെയ്തു.

നാല് വര്‍ഷമായി ഗള്‍ഫിലായിരുന്നു പ്രതി. നാട്ടില്‍ വന്നതിന് ശേഷം ജോലിയൊന്നുമില്ലാതെ കറങ്ങി നടക്കുകയായിരുന്ന പ്രതി റോബിന്‍ഹുഡ് സിനിമകളുടെ ആരാധകനായിരുന്നു. യുവാവിന്റെ ലക്ഷ്യം പൊലീസിന്റെ മികവ് പരിശോധിക്കുകയായിരുന്നുവെന്നും പൊലീസ് പറഞ്ഞു. ഇതിനായി സ്വന്തം നാട്ടിലുള്ള എടിഎം തന്നെ പ്രതി തിരഞ്ഞെടുക്കുകയും ചെയ്തു.

അറസ്റ്റ് ചെയ്യുമ്പോള്‍ യുവാവിന്റെ കൈയില്‍ കത്തിയും മോഷണ ശ്രമത്തിന് ഉപയോഗിച്ച മുട്ടി, സ്‌ക്രൂ ഡ്രൈവര്‍ എന്നിവ പ്രതിയുടെ വീട്ടില്‍ നിന്നും പൊലിസ് കണ്ടെടുത്തു.