ദുബൈ: ദുബൈയിൽ പുതിയ കമ്പനികൾ, നിക്ഷേപം എന്നിവയിൽ വീണ്ടും മുന്നിലെത്തി ഇന്ത്യൻ വ്യവസായികൾ. കഴിഞ്ഞ വർഷം ദുബൈ ചേംബർ ഓഫ് കൊമേഴ്സിൽ റജിസ്‌റ്റർ ചെയ്ത വിദേശ കമ്പനികളിൽ ഒന്നാം സ്‌ഥാനം ഇന്ത്യയ്ക്കാണ്. പുതിയതായി റജിസ്‌റ്റർ ചെയ്ത‌ത് 12,142 ഇന്ത്യൻ കമ്പനികളാണ്, മുൻ വർഷത്തേക്കാൾ 52.8% വളർച്ച രേഖപ്പെടുത്തി. ഇന്ത്യൻ നിക്ഷേപകരെ ദുബൈയിലേക്ക് ആകർഷിക്കുന്നത് മികച്ച അടിസ്ഥാന സൗകര്യങ്ങൾ, നിക്ഷേപ സൗഹൃദ അന്തരീക്ഷം എന്നിവയാണെന്ന് ചേംബറുകളുടെ പ്രസിഡന്റും സിഇഒയുമായ മുഹമ്മദ് അലി റാഷിദ് ലൂത്ത വ്യക്തമാക്കി.

ഇന്ത്യൻ വ്യവസായികൾക്കും നിക്ഷേപകർക്കും രാജ്യാന്തര വിപണിയിലേക്കു പ്രവേശിക്കാനുള്ള വാതിലായി ചേംബർ മാറിയെന്നും അദ്ദേഹം പറഞ്ഞു. 2018 മുതൽ മുംബൈയിൽ ഓഫിസ് തുറന്ന് ദുബൈ ഇൻ്റർ നാഷനൽ ചേംബർ ഇന്ത്യ - ദുബൈ വ്യാപാര ബന്ധത്തിൽ നിർണായക ഇടപെടലുകൾ നടത്തുന്നുണ്ട്. ദുബൈയിൽ ബിസിനസ് ആഗ്രഹിക്കുന്ന സംരംഭകർക്ക് എല്ലാ സഹായവും ചെയ്യുന്നതിനൊപ്പം വിശ്വസ്‌ത പങ്കാളികളെയും ബിസിനസ് നടത്തി പരിചയമുള്ള വിദഗ്‌ധരെയും പരിചയപ്പെടുത്തുന്നു.

ദുബൈയിൽ സംരംഭം തുടങ്ങുന്ന ഇന്ത്യക്കാർക്ക് ലോകത്തിന്റെ മറ്റു ഭാഗങ്ങളിലേക്കു ബിസിനസ് വളർത്താനുള്ള സൗകര്യവും നൽകുന്നുണ്ട്. 2023 ൽ ഇന്ത്യ-യുഎഇ എണ്ണ ഇതര വ്യാപാരം 4540 കോടി ഡോളറായി വളർന്നിട്ടുണ്ട്. 2030ൽ ഇത് 10000 കോടി ഡോളറിൽ എത്തും. ദുബൈ കമ്പനികൾ ഇപ്പോൾ ശ്രദ്ധകേന്ദ്രീകരിക്കുന്നത് നിർമിത ബുദ്ധി, ലോജിസ്‌റ്റിക്‌സ്, ഫിൻ ടെക്, ഹരിത ഊർജം തുടങ്ങിയ മേഖലകളിലാണ്. ദുബൈയിൽ മികച്ച തൊഴിലാളികളെയും വിദഗ്‌ധരായ പ്രഫഷനലുകളെയും ലഭിക്കുമെന്നതും, നികുതിയും നിയന്ത്രണങ്ങളും കുറവാണെന്നുള്ളതും പ്രധാന ആകർഷണങ്ങളാണ്.

Indian businessmen have reclaimed their position as top investors in new companies and investments in Dubai, showing a significant growth of 52.8% compared to the previous year.