മേജർ ലീഗ് സോക്കറിൽ ഇന്ന് നടന്ന മത്സരത്തിൽ എൽഎ ഗ്യാലക്സിക്കെതിരെ ഇന്റർ മയാമി തകർപ്പൻ വിജയമാണ് സ്വന്തമാക്കിയത്. മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു ഇന്റർ മയാമിയുടെ വിജയം. മത്സരത്തിൽ പരുക്കിൽ നിന്നും മുക്തനായി തിരിച്ചെത്തിയ സൂപ്പർ താരം ലയണൽ മെസി ഇന്റർ മയാമിക്കായി ലക്ഷ്യം കണ്ടിരുന്നു. മത്സരത്തിന്റെ രണ്ടാം പകുതിയിലായിരുന്നു മെസിയുടെ ഗോൾ പിറന്നത്. 

ഈ ഗോളിന് പിന്നാലെ എംഎൽഎസിൽ പുതിയൊരു നാഴികക്കല്ലും മെസി സ്വന്തമാക്കി. മേജർ ലീഗ് സോക്കർ മെസി നേടുന്ന 40ാം ഗോളായിരുന്നു ഇത്. ഇതോടെ എംഎൽഎസിന്റെ ചരിത്രത്തിൽ ഏറ്റവും വേഗത്തിൽ 40 ഗോളുകൾ പൂർത്തിയാക്കുന്ന രണ്ടാമത്തെ താരമായും മെസി മാറി. തന്റെ 44 മത്സരത്തിലാണ് മെസി ഈ നേട്ടം കൈവരിച്ചത്. 42 മത്സരങ്ങളിൽ നിന്നും 40 ഗോളുകൾ പൂർത്തിയാക്കിയ ജോസഫ് മാർട്ടിനസാണ് ഈ നേട്ടത്തിൽ ഒന്നാമത്തുള്ളത്. 

മത്സരത്തിൽ മെസിക്ക് പുറമെ ജോർഡി ആൽബ, ലൂയി സുവാരസ് എന്നിവരും അമേരിക്കൻ ക്ലബ്ബിനു വേണ്ടി ലക്ഷ്യം കണ്ടു. മത്സരത്തിന്റെ ആദ്യപകുതിയിൽ ആയിരുന്നു ആൽബ ഗോൾ നേടിയത്. സുവാരസ് മത്സരം അവസാനിക്കാൻ നിമിഷങ്ങൾ മാത്രം ബാക്കി നിൽക്കെ ഗോൾ നേടി. ജോസഫ് പെയിന്റ്സിലിന്റെ വകയായിരുന്നു എൽഎ ഗാലക്സിയുടെ ആശ്വാസ ഗോൾ. 

നിലവിൽ മേജർ ലീഗ് സോക്കർ പോയിന്റ് പട്ടികയിൽ അഞ്ചാം സ്ഥാനത്താണ് ഇന്റർ മയാമി. 24 മത്സരങ്ങളിൽ നിന്നും 13 വിജയവും ആറ് സമനിലയും അഞ്ച് തോൽവിയും അടക്കം 45 പോയിന്റാണ് മെസിയുടെയും സംഘത്തിന്റെയും കൈവശം ഉള്ളത്. ലീഗ്‌സ് കപ്പ്‌ ക്വാർട്ടർ ഫൈനലിൽ ടൈഗേഴ്സ് യുഎഎൻഎല്ലിനെതിരെയാണ് ഇന്റർ മയാമിയുടെ അടുത്ത മത്സരം. ഇന്റർ മയാമിയുടെ തട്ടകമായ ചെയ്സ് സ്റ്റേഡിയത്തിൽ ഓഗസ്റ്റ് 21നാണ് മത്സരം നടക്കുന്നത്.

Lionel Messi scored for Inter Miami against LA Galaxy in Major League Soccer. Messi's goal came in the second half of the match. Following this goal, Messi also achieved a new milestone in MLS.