കരുനാഗപ്പള്ളി: ഓച്ചിറയില്‍ യുവതിയുടെ എ.ടി.എം വിവരങ്ങള്‍ ചോര്‍ത്തിയെടുത്ത് പണം തട്ടിയ കേസില്‍ പൊലിസ് അന്വേഷണം ഊര്‍ജിതമാക്കി.
ഓച്ചിറയിലെ ഒരു സ്വകാര്യ സ്ഥാപനത്തില്‍ ജോലി ചെയ്യുന്ന പായ്ക്കുഴി അംബികാഭവനത്തില്‍ ഉഷയാ(40)ണ് തട്ടിപ്പിനിരയായത്. ബാങ്കിന്റെ കേന്ദ്ര ഓഫിസില്‍ നിന്നാണെന്ന് തെറ്റിദ്ധരിപ്പിച്ച് മൊബൈല്‍ ഫോണില്‍ കൂടി വിളിച്ചു വിവരങ്ങള്‍ ശേഖരിച്ചാണ് രണ്ട് ബാങ്കുകളില്‍ നിന്നായി 41,489 രൂപ തട്ടിയെടുത്തത്.
പൊലിസ് പറയുന്നത്:കഴിഞ്ഞ ദിവസം ജോലിക്കെത്തിയ ഉടനെ ഉഷയുടെ മൊബൈലില്‍ പഞ്ചാബ് നാഷണല്‍ ബാങ്കിന്റെ കേന്ദ്ര ഓഫിസില്‍ നിന്നും വിളിക്കുകയാണെന്നും നിങ്ങളുടെ എ.ടി.എം.കാര്‍ഡിന്റെ പ്രവര്‍ത്തനം നിലച്ചിരിക്കുകയാണെന്നും അതിനാല്‍ അക്കൗണ്ടിലുള്ള പണം പിന്‍വലിക്കാന്‍ സാധിക്കില്ലെന്നും ഹിന്ദിയില്‍ പറഞ്ഞുകൊണ്ടുള്ള കോള്‍ വന്നു. എ. ടി. എം. കാര്‍ഡിന്റെ പ്രവര്‍ത്തനം പുനരുജ്ജീവിപ്പിക്കുന്നതിനായി ബാങ്കില്‍ നിന്ന് ആവശ്യപ്പെടുന്ന വിവരങ്ങള്‍ നല്‍കണമെന്നും പറഞ്ഞു. ഹിന്ദി ഭാഷ വശമില്ലാത്തതിനെ തുടര്‍ന്ന് മറ്റൊരു ജീവനക്കാരനായ ബീഹാര്‍ സ്വദേശിയ്ക്ക് ഫോണ്‍ കൈമാറി. തുടര്‍ന്ന് ഉഷയുടെ എ.ടി.എം കാര്‍ഡിന്റെ നമ്പരും രഹസ്യ പിന്‍ കോഡും ഉള്‍പ്പെടെയുള്ള വിവരങ്ങള്‍ നല്‍കി. പിന്നീട് സംശയം തോന്നിയ ഉഷ പഞ്ചാബ് നാഷണല്‍ ബാങ്കിന്റെ ശാഖയില്‍ അന്വേഷിച്ചപ്പോഴാണ് തട്ടിപ്പ് പുറത്തായത്.
ഉഷയുടെ പഞ്ചാബ് നാഷണല്‍ ബാങ്കിലെ അക്കൗണ്ടില്‍ നിന്ന് പലതവണകളിലായി 37,489 രൂപയും എസ്.ബി.ടി.യിലെ അക്കൗണ്ടില്‍ നിന്ന് രണ്ട് തവണകളായി 4000 രൂപയുമാണ് നഷ്ടമായിട്ടുള്ളത്. അന്വേഷണം ഊര്‍ജിതമാക്കിയിട്ടുണ്ടെന്ന് ഓച്ചിറ എസ്.ഐ വിനോദ് ചന്ദ്രന്‍ അറിയിച്ചു.