തിരുവനന്തപുരം: ഒടുവില്‍ സംസ്ഥാനത്തെ പൊലിസ് മര്‍ദ്ദനങ്ങളില്‍ മൗനം വെടിഞ്ഞ് മുഖ്യമന്ത്രി പിണറായി വിജയന്‍. പൊലിസിനെതിരായ പരാതികള്‍ ഒറ്റപ്പെട്ട സംഭവമാണെന്നും, പരാതികള്‍ ഉയരുമ്പോള്‍ അത് പര്‍വതീകരിച്ച് കാണിക്കാനുള്ള ശ്രമങ്ങള്‍ നടക്കുകയാണെന്നും മുഖ്യമന്ത്രി പറഞ്ഞു. എല്‍ഡിഎഫ് യോഗത്തിലാണ് മുഖ്യമന്ത്രിയുടെ പരാമര്‍ശം. 

മുന്‍പ് സംഭവിച്ച ചില കാര്യങ്ങളെ കുറിച്ച് ഇപ്പോള്‍ പരാതി ഉയര്‍ന്ന് വരുന്നുണ്ട്. വിവരങ്ങളുടെ അടിസ്ഥാനത്തില്‍ കുറ്റക്കാര്‍ക്കെതിരെ നടപടി സ്വീകരിച്ച് വരികയാണ്. ആരോപണ വിധേയരായ പൊലിസുകാര്‍ക്കെതിരെ നടപടിയെടുക്കുന്നുണ്ട്. സംസ്ഥാനത്ത് ഉടനീളം ഇത്തരം സംഭവങ്ങള്‍ നടക്കുന്നുണ്ടെന്ന പ്രചരണം അവാസ്തവമാണ്. ഒറ്റപ്പെട്ട പരാതികള്‍ പര്‍വതീകരിച്ച് കാണിക്കാനുള്ള ശ്രമങ്ങള്‍ നടക്കുന്നുണ്ട്. തിരഞ്ഞെടുപ്പ് അടുത്ത സാഹചര്യത്തിലാണ് ഇത് നടക്കുന്നതെന്നും മുഖ്യമന്ത്രി വിശദീകരിച്ചു. 

കൂടാതെ പൊലിസിന്റെ ഭാഗത്ത് നിന്ന് ചെറിയ വീഴ്ച്ചകള്‍ പോലും വരാതിരിക്കാന്‍ ഇനി ശ്രദ്ധയും ഇടപെടലും ഉണ്ടാകുമെന്നും മുഖ്യമന്ത്രി ഉറപ്പ് നല്‍കി. പൊലിസിനെതിരെ വ്യാപക പരാതി ഉയരുകയും, സിപി ഐ സമ്മേളനത്തിലടക്കം കസ്റ്റഡി മര്‍ദ്ദനങ്ങള്‍ക്കെതിരെ വിമര്‍ശനം ഉയരുകയും ചെയ്ത സാഹചര്യത്തിലാണ് വിശദീകരണവുമായി മുഖ്യമന്ത്രി രംഗത്തെത്തിയത്. 

ALSO READ: പനി ബാധിച്ച് ആശുപത്രിയിലെത്തിയ യുവതിയെ ജീവനക്കാരനാണെന്ന വ്യാജേന പീഡിപ്പിച്ചു; പ്രതി അറസ്റ്റിൽ 

അതേസമയം സംസ്ഥാന പൊലിസിന് നാണക്കേടായി വാഹനാപകടക്കേസില്‍ പാറശാല എസ്എച്ച്ഒ അനില്‍കുമാറിന് സസ്‌പെന്‍ഷന്‍. കിളിമാനൂര്‍ സ്വദേശി രാജനെ വണ്ടിയിടിച്ച് കൊലപ്പെടുത്തിയ സംഭവത്തിലാണ് നടപടി. അപകടം നടന്നിട്ടും രാജനെ രക്ഷിക്കാന്‍ ശ്രമിക്കാതെ എസ്എച്ച്ഒ കടന്ന് കളഞ്ഞെന്നാണ് പരാതി. 

അപകടം നടന്നതിന് പിന്നാലെ രാജനെ ഇടിച്ചിട്ട കാര്‍ കിളിമാനൂര്‍ പൊലിസ് കസ്റ്റഡിയിലെടുത്തിരുന്നു. കസ്റ്റഡി വാഹനങ്ങള്‍ സ്റ്റേഷന് സമീപം എസി റോഡിലാണ് സാധാരണ ഗതിയില്‍ പാര്‍ക്ക് ചെയ്യുക. എന്നാല്‍ അനില്‍ കുമാറിന്റെ വാഹനം സ്റ്റേഷന്‍ വളപ്പിലെ മറ്റ് കാറുകള്‍ പാര്‍ക്ക് ചെയ്തതിന്റെ പിറകിലാണ് ഇട്ടിരുന്നത്. ഒറ്റനോട്ടത്തില്‍ കാര്‍ കാണാന്‍ കഴിയാത്ത വിധം കാര്‍ പാര്‍ക്ക് ചെയ്തത് കാര്‍ ഒളിപ്പിക്കാനുള്ള ശ്രമത്തിന്റെ ഭാഗമാണെന്ന് ആരോപണം ഉയര്‍ന്നിരുന്നു. 

chief minister pinarayi vijayan statement on custodial harassment in kerala