മാഞ്ചസ്റ്റര്‍: ഇംഗ്ലണ്ടിനെതിരായ ഏക ടി20 മത്സരത്തില്‍ പാകിസ്താനു ജയം. 31 പന്ത് ബാക്കിനില്‍ക്കേ ഒന്‍പതു വിക്കറ്റിനാണ് പാകിസ്താന്‍ വിജയം സ്വന്തമാക്കിയത്. ആദ്യം ബാറ്റു ചെയ്ത ഇംഗ്ലണ്ട് നിശ്ചിത 20 ഓവറില്‍ ഏഴു വിക്കറ്റ് നഷ്ടത്തില്‍ 135 റണ്‍സെടുത്തപ്പോള്‍ പാകിസ്താന്‍ 14.5 ഓവറില്‍ ഒരു വിക്കറ്റ് മാത്രം നഷ്ടപ്പെടുത്തി 139 റണ്‍സ് കണ്ടെത്തി വിജയിക്കുകയായിരുന്നു. ഏകദിന പരമ്പര 4-1നു അടിയറവച്ചതിനു പിന്നാലെയാണ് പാകിസ്താന്റെ ടി20 ജയം.
വിജയം തേടിയിറങ്ങിയ പാകിസ്താനു വേണ്ടി ഓപണര്‍മാര്‍ 107 റണ്‍സിന്റെ കൂട്ടുകെട്ടുയര്‍ത്തി വിജയത്തിനു ശക്തമായ അടിത്തറ പാകി. ഓപണര്‍മാരായ ഖാലിദ് ലത്തീഫ് 42 പന്തില്‍ 59 റണ്‍സും ഷര്‍ജീല്‍ ഖാന്‍ 36 പന്തില്‍ 59 റണ്‍സുമെടുത്തു.
ഷര്‍ജീലാണ് പുറത്തായ ഏക താരം. ബാബര്‍ അസം 15 റണ്‍സുമായി പുറത്താകാതെ നിന്നു. പാകിസ്താനു നഷ്ടമായ ഏക വിക്കറ്റ് ആദില്‍ റഷീദ് സ്വന്തമാക്കി.
നേരത്തെ ടോസ് നേടി ബാറ്റിങ് തിരഞ്ഞെടുത്ത ഇംഗ്ലണ്ടിനായി അലക്‌സ് ഹെയ്ല്‍സ് (26 പന്തില്‍ 37) മാത്രമാണ് കാര്യമായി പൊരുതിയത്. 20 പന്തില്‍ 21 റണ്‍സ് എടുത്ത ജാസണ്‍ റോയിയും ഭേദപ്പെട്ട പ്രകടനം നടത്തി. പാകിസ്താനായി വഹാബ് റിയാസ് നാലോവറില്‍ 18 റണ്‍സ് മാത്രം വഴങ്ങി മൂന്നു വിക്കറ്റ് വീഴ്ത്തി ഇംഗ്ലണ്ടിന്റെ ബാറ്റിങിനു കടിഞ്ഞാണിട്ടു. ഇമത് വാസിം, ഹസന്‍ അലി എന്നിവര്‍ രണ്ടു വീതം വിക്കറ്റും പങ്കിട്ടു. വഹാബ് റിയാസാണ് കളിയിലെ കേമന്‍.