തിരുവനന്തപുരം: കേന്ദ്ര സര്‍ക്കാരിന്റെ കയ്യില്‍ നിന്ന് എസ്.എസ്.കെ പണം കിട്ടിയെന്ന് സ്ഥിരീകരിച്ച് വിദ്യാഭ്യാസ മന്ത്രി വി ശിവന്‍കുട്ടി. കുഞ്ഞുങ്ങള്‍ക്ക് അര്‍ഹതപ്പെട്ട ഫണ്ടാണിത്. കേരളത്തിന് ലഭിക്കേണ്ട 109 കോടി രൂപയില്‍ 92.41 കോടി രൂപയാണ് ചൊവ്വാഴ്ച്ച നല്‍കിയത്. ഇനി 16 കോടി രൂപ കൂടി ലഭിക്കാനുണ്ട്. അത് ഈ ആഴ്ച ലഭിച്ചേക്കും. പത്തിന് കേന്ദ്ര വിദ്യാഭ്യാസ മന്ത്രിയെ കാണുമെന്നും മന്ത്രി പറഞ്ഞു.  

2023-24ല്‍ 188.58 കോടി രൂപയും, 2024-25-ല്‍ 513.14 കോടിയും, 2025-26-ല്‍ 486.1 കോടി രൂപയുമാണ് കേന്ദ്രം കുടിശ്ശിക വരുത്തിയത്. ഈ കുടിശ്ശിക കിട്ടുമെന്നുതന്നെയാണ് പ്രതീക്ഷിക്കുന്നത്. ബിഹാര്‍ തെരഞ്ഞെടുപ്പ് ക്യാമ്പയിനില്‍ സജീവമായ കേന്ദ്രമന്ത്രി, അതു കഴിഞ്ഞ് ഡല്‍ഹിയിലെത്തുന്ന 10-നാണ് കൂടിക്കാഴ്ചയെന്നും ശിവന്‍കുട്ടിഅറിയിച്ചു. 

പി.എം ശ്രീയില്‍ ഒപ്പിട്ടത് കൊണ്ടുള്ള നേട്ടമാണോ കോട്ടമാണോ എന്ന് പറയുന്നില്ല. നമുക്ക് കാര്യം നടന്നാല്‍ മതിയെന്നും മന്ത്രി മാധ്യമങ്ങളോട് പറഞ്ഞു. കേന്ദ്രത്തിന് കത്ത് അയക്കുന്നതില്‍ കാലതാമസം ഇല്ല. സ്വാഭാവിക നടപടിക്രമം മാത്രമാണിത്. നിയമോപദേശം കിട്ടിയാല്‍ ഉടന്‍ അയക്കും. മന്ത്രിസഭാ ഉപസമിതി രൂപീകരിച്ചു ഉത്തരവ് ഇറക്കി. കത്ത് വൈകുന്നു എന്ന വിഷമം സി.പി.ഐക്കില്ല. 

ചില പത്രങ്ങള്‍ക്ക് വലിയ വിഷമമാണ്. പ്രശ്‌നം തീര്‍ന്നല്ലോ എന്ന് കരുതി ചിലര്‍ ഏങ്ങിയേങ്ങി കരയുകയാണെന്നും മന്ത്രി പറഞ്ഞു. എന്നാല്‍ കത്ത് വൈകിയത് കൊണ്ടാണോ ഫണ്ട് വന്നത് എന്ന് ചോദ്യത്തിന് ആവശ്യമില്ലാത്ത കാര്യങ്ങളിലേക്ക് പോകേണ്ടെന്നായിരുന്നു മന്ത്രിയുടെ മറുപടി.

Kerala Education Minister V. Sivankutty confirmed that the state has received the first installment of the Samagra Shiksha Kerala (SSK) fund from the Central Government. Out of the ₹109 crore allocated to Kerala, ₹92.41 crore has been disbursed, with the remaining ₹16 crore expected within the week. Sivankutty added that he will meet the Union Education Minister on the 10th of this month to discuss pending dues.