ചെന്നൈ: ഐപിഎൽ 2026 സീസണിന് മുന്നേ മെഗാ താരക്കൈമാറ്റത്തിന് കളമൊരുങ്ങുന്നതായി സൂചന. രാജസ്ഥാൻ റോയൽസ് നായകനും മലയാളി സൂപ്പർ താരവുമായ സഞ്ജു സാംസൺ ചെന്നൈ സൂപ്പർ കിംഗ്‌സിലേക്ക് എത്തിയേക്കും. ഈ ട്രേഡ് യാഥാർത്ഥ്യമായാൽ, ഐപിഎൽ ചരിത്രത്തിലെ ഏറ്റവും വലിയ കൈമാറ്റങ്ങളിൽ ഒന്നായി ഇത് മാറും.

എംഎസ് ധോണിക്ക് ശേഷമുള്ള അടുത്ത നായകനെ കണ്ടെത്താനാണ് ചെന്നൈയുടെ നീക്കം. ഇതിന് പകരമായി രാജസ്ഥാൻ റോയൽസ് ആവശ്യപ്പെടുന്നത് സിഎസ്കെയുടെ രണ്ട് സൂപ്പർ താരങ്ങളെയാണെന്നാണ് ഏറ്റവും പുതിയ റിപ്പോർട്ടുകൾ.

ALSO READ: സഞ്ജുവിന് പകരം ഇന്ത്യൻ ഇതിഹാസം രാജസ്ഥാനിലേക്ക്; വലവിരിച്ച് റോയൽസ് 

ജഡേജയും സാം കറനും രാജസ്ഥാൻ റോയൽസിലേക്ക്

റിപ്പോർട്ടുകൾ അനുസരിച്ച്, സഞ്ജു സാംസണ് പകരമായി ഇന്ത്യൻ ഓൾറൗണ്ടർ രവീന്ദ്ര ജഡേജയും വിദേശ സൂപ്പർ ഓൾറൗണ്ടർ സാം കറനും രാജസ്ഥാൻ റോയൽസിൽ എത്തുമെന്നാണ് സൂചന. ഒരു വിക്കറ്റ് കീപ്പർ-ക്യാപ്റ്റനെ നഷ്ടപ്പെടുത്തിയാലും, ജഡേജയെയും സാം കറനെയും ടീമിലെത്തിക്കാൻ കഴിഞ്ഞാൽ റോയൽസിന്റെ ടീം ബാലൻസ് അവിശ്വസനീയമാംവിധം മെച്ചപ്പെടും. അനുഭവസമ്പന്നനായ ജഡേജ നൽകുന്ന സ്ഥിരതയും, പേസ് ബൗളിംഗിലും ബാറ്റിംഗിലും ഫീൽഡിംഗിലുമുള്ള കറന്റെ നിർണ്ണായക സംഭാവനയും ടീമിന് വലിയ മുതൽക്കൂട്ടാകും.

നിലവിൽ ഇരു ഫ്രാഞ്ചൈസികളും തമ്മിൽ ചർച്ചകൾ നടക്കുന്നുണ്ടെങ്കിലും, ഇതു സംബന്ധിച്ച് ഔദ്യോഗിക സ്ഥിരീകരണം വന്നിട്ടില്ല. ട്രേഡ് വിൻഡോ അടയ്ക്കുന്നതിന് മുമ്പ് ഐപിഎൽ ചരിത്രത്തിലെ ഈ വൻ കൈമാറ്റം സംഭവിക്കുമോ എന്നറിയാൻ ആരാധകർ കാത്തിരിക്കുകയാണ്.

നേരത്തേ സഞ്ജുവിന്റെ ട്രേഡുമായി ബന്ധപ്പെട്ട് ചെന്നൈയും രാജസ്ഥാനും തമ്മിൽ വളരെ ഗൗരവമായി ചർച്ച നടക്കുന്നുവെന്നാണ് ക്രിക് ബസ് റിപ്പോർട്ട് ചെയ്തിരുന്നു. അതേസമയം ഡൽഹി ക്യാപിറ്റസും സഞ്ജുവിനെ സ്വന്തമാക്കാൻ ശ്രമം നടത്തിയിരുന്നു. സഞ്ജുവിന് പകരമായി ഡൽഹി സൗത്ത് ആഫ്രിക്കൻ സൂപ്പർതാരം ട്രിസ്റ്റൻ സ്റ്റബ്‌സിനെ രാജസ്ഥാന് കൈമാറുമെന്നാണ് ദി ടൈംസ് ഓഫ് ഇന്ത്യ റിപ്പോർട്ട് ചെയ്തത്. 

2025 ഐപിഎല്ലിൽ സീസണിൽ രാജസ്ഥാൻ റോയൽസ് നിരാശാജനകമായ പ്രകടനമാണ്‌ പുറത്തെടുത്തത്. എട്ട് പോയിന്റുമായി ഒമ്പതാം സ്ഥാനത്താണ് രാജസ്ഥാൻ ഫിനിഷ് ചെയ്‌തത്. പരുക്കേറ്റതിന് പിന്നാലെ സഞ്ജുവിന് രാജസ്ഥാനൊപ്പമുള്ള ധാരാളം മത്സരങ്ങൾ നഷ്ടമായിരുന്നു. ഡൽഹി ക്യാപ്പിറ്റൽസിനെതിരായ മത്സരത്തിൽ പരുക്കേറ്റ് സഞ്ജു പുറത്തായിരുന്നു.

മത്സരത്തിൽ റിട്ടയേർഡ് ഹാർട്ടായാണ് സഞ്ജു മടങ്ങിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. സഞ്ജുവിന്റെ അഭാവത്തിൽ റിയാൻ പരാഗ് ആയിരുന്നു പല മത്സരങ്ങളിലും രാജസ്ഥാനെ നയിച്ചിരുന്നത്. 

reports suggest that rajasthan royals captain sanju samson could be traded to chennai super kings ahead of the upcoming ipl season. according to sources, talks are underway for a possible player swap deal between the two franchises. if the trade goes through, some of csk’s star players might move to rajasthan royals in exchange.