റാസൽഖൈമ: യുഎഇയുടെ വടക്കൻ എമിറേറ്റുകളിൽ, പ്രത്യേകിച്ച് റാസൽഖൈമയിൽ കഴിഞ്ഞ രാത്രി പെയ്ത കനത്ത മഴയിലും ശക്തമായ കാറ്റിലും വ്യാപകമായ നാശനഷ്ടം. രാത്രി മുഴുവൻ നീണ്ടുനിന്ന കൊടുങ്കാറ്റിലും മഴയിലും നിരവധി വീടുകൾക്കും വാഹനങ്ങൾക്കും കേടുപാടുകൾ സംഭവിച്ചു. റാസൽഖൈമയിലെ ഷമാൽ, ഖോർ ഖ്വൈർ, അൽ ഷാം തുടങ്ങിയ ഇടങ്ങളിലാണ് മഴ കനത്ത ആഘാതം സൃഷ്ടിച്ചത്. 

ശക്തമായ കാറ്റിൽ മരങ്ങൾ കടപുഴകി വീണും കെട്ടിടങ്ങളുടെ അവശിഷ്ടങ്ങൾ പതിച്ചും നിരവധി കാറുകൾക്ക് നാശനഷ്ടങ്ങൾ സംഭവിച്ചു. ചില വീടുകളിൽ വാട്ടർ ടാങ്കുകൾ തകരുകയും ഗാരേജുകളിലേക്കും ബാൽക്കണികളിലേക്കും വെള്ളം ഇരച്ചുകയറുകയും ചെയ്തതായി താമസക്കാർ പറഞ്ഞു. കനത്ത മഴയെത്തുടർന്ന് റാസൽഖൈമയിലെ ജബൽ ജൈസ് പർവ്വതനിരകളിൽ വെള്ളച്ചാട്ടങ്ങൾ രൂപപ്പെട്ടു.

അതേസമയം, കനത്ത കാലാവസ്ഥാ വ്യതിയാനത്തിനിടയിലും രാജ്യത്തെ പ്രധാന വിമാനത്താവളങ്ങളുടെ പ്രവർത്തനം നിലവിൽ സാധാരണ നിലയിലാണെന്ന് അധികൃതർ അറിയിച്ചു. ദുബൈ അന്താരാഷ്ട്ര വിമാനത്താവളത്തിൽ (DXB) വ്യാഴാഴ്ച രാവിലെ മുതൽ വിമാന സർവീസുകൾ തടസ്സമില്ലാതെ നടക്കുന്നുണ്ടെന്ന് വക്താവ് സ്ഥിരീകരിച്ചു. 

ALSO READ: രാജ്യത്ത് മഴ കനക്കുമെന്ന് മുന്നറിയിപ്പ്; സുരക്ഷാനിർദ്ദേശങ്ങൾ പുറപ്പെടുവിച്ച് ദുബൈ മുനിസിപ്പാലിറ്റി 

എമിറേറ്റ്‌സ്, ഫ്ലൈ ദുബൈ, ഇത്തിഹാദ്, എയർ അറേബ്യ തുടങ്ങിയ പ്രമുഖ വിമാനക്കമ്പനികളൊന്നും നിലവിൽ സർവീസുകൾക്ക് കാലതാമസമോ റദ്ദാക്കലോ റിപ്പോർട്ട് ചെയ്തിട്ടില്ല. എങ്കിലും യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുൻപ് അതത് വിമാനക്കമ്പനികളുടെ വെബ്‌സൈറ്റുകൾ വഴി അപ്‌ഡേറ്റുകൾ പരിശോധിക്കണമെന്ന് അധികൃതർ നിർദ്ദേശിച്ചിട്ടുണ്ട്.

റാസൽഖൈമയിലെ താമസക്കാർക്ക് പൊലിസ് മുൻകൂട്ടി അലേർട്ടുകൾ നൽകിയിരുന്നു. ശക്തമായ കാറ്റിനും മഴയ്ക്കും സാധ്യതയുള്ളതിനാൽ അരുവികൾക്കും താഴ്ന്ന പ്രദേശങ്ങൾക്കും സമീപം പോകരുതെന്ന് പൊലിസ് കർശന മുന്നറിയിപ്പ് നൽകിയിട്ടുണ്ട്. ദുബൈയിൽ ആകാശം മേഘാവൃതമാണെങ്കിലും മഴ ഇതുവരെ റിപ്പോർട്ട് ചെയ്തിട്ടില്ല. 

പ്രധാന പാതകളായ ഷെയ്ഖ് സായിദ് റോഡിലടക്കം ഗതാഗതം സാധാരണ നിലയിലാണ്. വടക്കൻ ജില്ലകളിൽ ആലിപ്പഴ വർഷത്തോടു കൂടിയ മഴയാണ് ഉണ്ടായതെന്ന് നാട്ടുകാർ പറയുന്നു. തകർന്ന മരക്കൊമ്പുകളും അവശിഷ്ടങ്ങളും നീക്കം ചെയ്യുന്ന പ്രവർത്തനങ്ങൾ റാസൽഖൈമയിൽ പുരോഗമിക്കുകയാണ്. വരും മണിക്കൂറുകളിലും കാലാവസ്ഥ നിരീക്ഷിക്കണമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.

Heavy rain and strong winds lashed the northern emirates of the UAE, especially Ras Al Khaimah, last night, causing widespread damage. Many homes and vehicles were damaged in the storm and rain that lasted all night. The rain caused heavy damage in areas such as Shamal, Khor Khwayr and Al Sham in Ras Al Khaimah.